കോതമംഗലം: താലൂക്കിൽ ഓണക്കിറ്റുകളുടെ വിതരണം ആരംഭിച്ചു. 14 ഇനങ്ങൾ അടങ്ങുന്ന കിറ്റുകളുടെ വിതരണം സമയബന്ധിതമായി പൂർത്തീകരിക്കുമെന്ന് ആന്റണി ജോൺ എം.എൽ.എ പറഞ്ഞു. മഞ്ഞ കാർഡ് ഉടമകൾക്കും എൻ.പി.ഐ കാർഡ് ഉടമകൾക്കുമാണ് കിറ്റുകൾ റേഷൻ കട വഴി വിതരണം ചെയ്യുന്നത്. ക്ഷേമ സ്ഥാപനങ്ങളിൽ നാലു പേർക്ക് ഒരു കിറ്റ് എന്ന രീതിയിൽ ഉദ്യോഗസ്ഥർ നേരിട്ട് എത്തിക്കും. ചെറുപയർ പരിപ്പ്, സേമിയ പായസം മിക്സ്, മിൽമ, നെയ്യ്, കശുവണ്ടി പരിപ്പ്, വെളിച്ചെണ്ണ, സാമ്പാർ പൊടി, മുളകുപൊടി, മഞ്ഞൾപൊടി, മല്ലിപ്പൊടി, തേയില, ചെറുപയർ, തുവര പരിപ്പ്, പൊടിയുപ്പ് എന്നിവയും തുണി സഞ്ചിയും അടക്കം തിരഞ്ഞെടുത്ത 14 ഇനങ്ങൾ ഉൾപ്പെടുന്നതാണ് ഓണക്കിറ്റ്. താലൂക്ക് തല ഉദ്ഘാടനം ആന്റണി ജോൺ എം.എൽ.എ നിർവഹിച്ചു. മുൻസിപ്പൽ ചെയർമാൻ കെ.കെ ടോമി അദ്ധ്യക്ഷത വഹിച്ചു. വാർഡ് കൗൺസിലർമാരായ സിന്ധു ജിജോ,സിജോ വർഗീസ്, സി.പി.ഐ താലൂക്ക് സെക്രട്ടറി പി.ടി ബെന്നി, താലൂക്ക് സപ്ലൈ ഓഫീസർ ഷിജു കെ. തങ്കച്ചൻ, റേഷൻ ഇൻസ്‌പെക്ടർമാരായ ഷൈജു വർഗീസ്, ജിജി പോൾ, ഓൾ കേരള റിട്ടെയിൽ റേഷൻ ഡീലേഴ്സ് അസോസിയേഷൻ ജില്ലാ പ്രസിഡന്റ് വി.ബേബി എന്നിവർ സന്നിഹിതരായിരുന്നു.