ഇലഞ്ഞി: ഇലഞ്ഞി ഗ്രാമപഞ്ചായത്ത് പത്താം വാർഡിൽ ലയൺസ് ക്ലബ് പാർപ്പിട പദ്ധതിയുടെ ഭാഗമായി മണപ്പുറം ഫിനാൻസിന്റെയും ഇടതോട്ടിയിൽ ചാരിറ്റീസിന്റെയും മറ്റ് സുമനസുകളുടെയും സഹകരണത്തോടെ പണി തീർത്ത രണ്ടു വീടുകളുടെയും ലൈഫ് പദ്ധതിയിൽ പണി തീർത്ത ഒരു വീടിന്റെയും താക്കോൽ വിതരണം നടന്നു. ഇതോടൊപ്പം വാർഡ് മെമ്പർ മാജി സന്തോഷും ഭർത്താവ് സന്തോഷ്‌ സണ്ണിയും ചേർന്ന് പ്രദേശത്ത് ഇരുപത് കുടുംബങ്ങൾക്കായി സ്വന്തം സ്ഥലത്ത് സൗജന്യമായി നിർമിച്ചു നൽകുന്ന കിണറിന്റെ കുറ്റിയടിക്കൽ കർമ്മം ഇലഞ്ഞി സെന്റ് പീറ്റേഴ്സ് ആൻഡ് പോൾസ് ഫൊറോനാപ്പള്ളി വികാരി ഫാ. ജോസഫ് ഇടത്തുംപറമ്പിൽ നിർവഹിച്ചു. ഇലഞ്ഞി ലയൺസ് ക്ലബ് പ്രസിഡന്റ്‌ പീറ്റർ പോളിന്റെ അദ്ധ്യക്ഷതയിൽ ചേർന്ന യോഗത്തിൽ ഫസ്റ്റ് ഡിസ്ട്രിക്ട് വൈസ് ഗവർണർ കെ.ബി. ഷൈൻ ലയൺസ് ഭവന പദ്ധതിയിൽ പണിത വീടുകളുടെ താക്കോൽ ദാനം നടത്തി. ഭവന പദ്ധതിക്ക് നേതൃത്വം നൽകിയ സന്തോഷ്‌ സണ്ണി, മാജി സന്തോഷ്‌, ജി. മുരളീധരൻ, സാജു പീറ്റർ എന്നിവരെ ആദരിച്ചു. മണപ്പുറം ഫിനാൻസ് സി.ഇ.ഒ ജോർജ് ഡി. ദാസ്, സി.ജെ. ജെയിംസ്, ജോസ് മങ്ങാലി, ക്യാപ്റ്റൻ എൽദോ എബ്രഹാം, ബിനു വർഗീസ്, അഡ്വ. സോണി, ബേബി സെബാസ്റ്റ്യൻ തുടങ്ങിയവർ സംസാരിച്ചു.