പറവൂർ: പറവൂ‌‌ർ താലൂക്ക് ഗവ. ആശുപത്രി കോമ്പൗണ്ടിലെ മരം വെട്ടിമാറ്റുന്നതി​നി​ടയി​ൽ സുരക്ഷയ്ക്കായി കെട്ടിയിരുന്ന കയർ ശരീരത്തിൽ മുറുകി തൊഴിലാളിക്ക് ദാരുണാന്ത്യം. തത്തപ്പിള്ളി​ വല്യത്ത് റോഡിൽ വാടകയ്ക്ക് താമസിക്കുന്ന വയനാട് വൈത്തിരി വട്ടപ്പാറ ഐഷ പ്ലാന്റേഷനിൽ മോഹൻകുമാറാണ് (മോനു 28) മരിച്ചത്. ഇന്നലെ വൈകി​ട്ട് മൂന്നരയോടെ മരച്ചില്ലകൾ വെട്ടിമാറ്റുന്നതിനിടെ 45 അടി ഉയരത്തിലായിരുന്നു അപകടം.

വെട്ടുന്ന ചില്ലകൾ സുരക്ഷിതമായി താഴെയി​റക്കാൻ മോഹൻകുമാർ കയർ കെട്ടിയിരുന്നു. മരച്ചില്ല ഒടിഞ്ഞതോടെ മരത്തിനോട് ചേർത്ത് കെട്ടിയിരുന്ന കയർ ശരീരത്തിൽ മുറുകുകയായി​രുന്നു. കഴുത്തിലും നെഞ്ചിലും കയർ മുറുകിയതോടെ താഴേക്ക് ഇറങ്ങാൻ കഴിയാതെ മോഹൻകുമാർ മരക്കൊമ്പിൽ തൂങ്ങിക്കിടന്നു. നിരവധിപേർ നോക്കി നിൽക്കെയാണ് അപകടം. ഫയർഫോഴ്സ് ഒന്നരമണിക്കൂറോളം പണിപ്പെട്ട് വലയും വടവും ഉപയോഗി​ച്ചാണ് താഴെ ഇറക്കിയത്. നെഞ്ചിന്റെ ഭാഗം വലിഞ്ഞുമുറുകിയതാണ് മരണകാരണമെന്നാണ് പ്രാഥമിക നിഗമനം. വാരിയെല്ലുകൾ തകർന്ന നിലയിലായിരുന്നു. മൃതദേഹം താലൂക്ക് ആശുപത്രി മോർച്ചറി​യി​ൽ. ഭാര്യ: അശ്വതി. മക്കൾ: ഋതിക, ഋതു, ഋഷിത.

ഒരാഴ്ചയ്ക്ക് മുമ്പാണ് മരം മുറിക്കൽ തുടങ്ങിയത്. ഇന്നലെ വൈകിട്ടോടെ തീരേണ്ടതായിരുന്നു. മോഹൻകുമാറിന്റെ ഭാര്യയുടെ വീട് വൈപ്പിനിൽ നെടുങ്ങാടാണ്. അവിടെ രണ്ടുവർഷം താമസിച്ചശേഷം കഴിഞ്ഞ മൂന്നുവർഷമായി തത്തപ്പിള്ളിയിലാണ് താമസം.