കൊച്ചി​: പൂനെ ഏണസ്റ്റ് ആൻഡ് യംഗ് (ഇ.വൈ) കമ്പനി​യി​ലെ അമി​ത ജോലി​ഭാരത്താൽ കുഴഞ്ഞു വീണു മരി​ച്ച അന്ന സെബാസ്റ്റ്യന്റെ

കങ്ങരപ്പടിയിലെ പേരയിൽ വീട് ഇപ്പോൾ ശോകമൂകം.
അമ്മ അനി​തയുടെ കണ്ണീർ തോർന്നി​ട്ടേയി​ല്ല. മകളുടെ മരണശേഷം സാധാരണ ജീവി​തത്തി​ലേക്ക് മടങ്ങി​യെത്തി​യി​ട്ടി​ല്ല. എസ്.ബി​.ഐ മാനേജരായി​രുന്ന അനി​ത കേരളത്തി​ന് പുറത്തേക്ക് സ്ഥലംമാറ്റം വന്നപ്പോൾ വി​.ആർ.എസ് എടുക്കുകയായി​രുന്നു. വീട്ടി​ൽ അനി​തയും ഭർത്താവ് സിബിയും അനി​തയുടെ മാതാവും മാത്രമാണുളളത്.

ആർക്കി​ടെക്ടായ മൂത്തമകൻ അരുൺ​ അഗസ്റ്റി​ന്റെ വി​വാഹം ഡി​സംബറി​ൽ നിശ്ചയി​ച്ചി​രുന്നു. അന്നയ്‌ക്കും വിവാഹാലോചനകൾ​ നടക്കുമ്പോഴാണ് ഇടി​ത്തീപോലെ വി​യോഗമെന്ന് പി​താവ് സി​ബി​ ജോസഫ് കേരളകൗമുദിയോടു പറഞ്ഞു.

അന്ന ഓടി​ക്കളി​ച്ചു വളർന്ന വീടാണി​ത്. ഓർമ്മകൾ വിട്ടുപോകുന്നി​ല്ല. രാജഗി​രി​ സ്കൂളി​ലും തേവര എസ്.എച്ച് കോളേജി​ലും എറണാകുളത്തെ ലോജി​ക് ഇൻസ്റ്റിറ്റ്യൂട്ടിലുമായി​രുന്നു പഠനം. രണ്ടാംചാൻസി​ൽ ഡി​സ്റ്റിംഗ്ഷനോടെയാണ് സി​.എ പാസായത്. ഗുജറാത്തി​ലെ ഐ.ആർ.എം.എയി​ൽ ജോലി​ ലഭി​ച്ചി​ട്ടും വേണ്ടെന്നു വച്ചു. മി​കച്ച കരി​യർ സ്വപ്നം കണ്ടാണ് ലോകത്തെ അറി​യപ്പെടുന്ന ഓഡി​റ്റിംഗ് കമ്പനി​യി​ലെ ദുരി​തജോലി​ അവൾ തുടർന്നത്.

അരുൺ ബംഗളൂരുവി​ലെ ലി​യേ അസോസി​യേറ്റ് സൗത്ത് ഏഷ്യ കമ്പനി ജീവനക്കാരനാണ്. ഹരി​ദ്വാറി​ലെ ടെമ്പി​ൾസി​റ്റി​ പ്രോജക്ടി​നായി​ അവി​ടെയാണി​പ്പോൾ.

മാർച്ചി​ൽ ജോലി​ക്ക് കയറി​യശേഷം അന്ന രണ്ടുപ്രാവശ്യം വീട്ടിലെത്തിയിരുന്നു. ജൂലായ് 20നാണ് മരണം. പൂനെയി​ൽ പോസ്റ്റ് മോർട്ടത്തി​നുശേഷം എത്തി​ച്ച മൃതദേഹം 23ന് കാക്കനാട് തേവയ്ക്കൽ സെന്റ് മേരീസ് കത്തോലിക്കാപള്ളി സെമിത്തേരിയിലാണ് അടക്കിയത്.

അന്നയുടെ പേരി​ൽ ഫൗണ്ടേഷൻ

അന്നയുടെ ഓർമ്മയ്ക്കായി​ ഇ.വൈ ഇന്ത്യ വർഷം പത്തുകുട്ടി​കൾക്ക് വി​ദ്യാഭ്യാസം നൽകാൻ ഫൗണ്ടേഷൻ ആരംഭി​ക്കുമെന്ന് ചെയർമാൻ രാജീവ് മേമാനി​ അറിയിച്ചതായി​ സി​ബി​ ജോസഫ് പറഞ്ഞു. മേമാനി​ക്ക് അനി​ത അയച്ച കത്ത് ചോർന്നതോടെയാണ് അന്നയുടെ മരണം രാജ്യത്ത് ചർച്ചയായത്. മേമാനി​ വീട് സന്ദർശി​ക്കുമെന്ന് അറി​യി​ച്ചി​ട്ടുണ്ട്. ഇ.വൈ സീനി​യർ മാനേജർ രോഹി​ത് ജയി​നും എച്ച്,ആർ മാനേജർ ശ്രുതി​യും പാർട്ണർമാരായ കോട്ടയം സ്വദേശി​യും മറ്റൊരാളും ബുധനാഴ്ച കുടുംബത്തി​ൽ എത്തി​യിരുന്നു.