ആലുവ: ശ്രീനാരായണ ഗുരുദേവന്റെ പാദസ്പർശമേറ്റ് പവിത്രമായ ആലുവ അദ്വൈതാശ്രമത്തിൽ ഗുരുദേവന്റെ 97-ാമത് മഹാസമാധി ദിനാചരണം ഭക്തിസാന്ദ്രമായി. മഹാസമാധി പൂജയിലും സമൂഹപ്രാർത്ഥനയിലും ആയിരക്കണക്കിന് ശ്രീനാരായണീയർ പങ്കെടുത്തു.

പുലർച്ചെ ഗുരുമന്ദിരത്തിൽ ക്ഷേത്രം മേൽശാന്തി പി.കെ. ജയന്തന്റെ മുഖ്യകാർമ്മികത്വത്തിൽ വിശേഷാൽ പൂജയോടെ ചടങ്ങുകൾ ആരംഭിച്ചു. തുടർന്ന് ശാന്തിഹവനം, അഷ്ടദ്രവൃ ഗണപതിഹവനം, ഗുരുദേവ കൃതികളുടെ പാരായണം, ഉപവാസം, പ്രാർത്ഥന, സത്സംഗം, മഹാശാന്തി ഹവനം, കലശ പൂജ എന്നിവ നടന്നു. വൈകിട്ട് മൂന്നിന് ആരംഭിച്ച മഹാസമാധി പൂജയിലും സമൂഹ പ്രാർത്ഥനയിലും ആയിരങ്ങൾ എത്തി. ആശ്രമം സെക്രട്ടറി സ്വാമി ധർമ്മചൈതന്യയുടെ മുഖ്യകാർമ്മികത്വത്തിലായിരുന്നു മഹാസമാധി പൂജ. തുടർന്ന് പ്രസാദ വിതരണവും നടത്തി.

സ്വാമിനി മാതാ നാരായണ ദർശനമയി, സ്വാമിനി മാതാ നാരായണ ചിത് വിലാസിനി, സ്വാമിനി മാതാ ചിത് പ്രകാശിനി, മധുസൂദനൻ ശാന്തി, ചന്ദ്രൻ ശാന്തി എന്നിവരും ചടങ്ങുകൾക്ക് നേതൃത്വം നൽകി.

എസ്.എൻ.ഡി.പി യോഗം ആലുവ യൂണിയൻ ഭാരവാഹികൾ, ആലുവ ശ്രീനാരായണ ക്ലബ് ഭാരവാഹികൾ, ഇതര ശ്രീനാരായണ സംഘടനകളുടെ ഭാരവാഹികൾ എന്നിവർ മഹാസമാധി പൂജയിൽ പങ്കെടുത്തു.