കോതമംഗലം: ആഗോള സർവമത തീർത്ഥാടന കേന്ദ്രമായ കോതമംഗലം മാർതോമ ചെറിയപള്ളിയിൽ കന്നി 20 പെരുന്നാളിന് കൊടിയേറി. മഹാ പരിശുദ്ധനായ യൽദോ മാർ ബസേലിയോസ് ബാവയുടെ 339-ാം ഓർമ്മപ്പെരുന്നാളാണ് ഈ വർഷം ആഘോഷിക്കുന്നത്. പരിശുദ്ധ ബസേലിയോസ് യൽദോ ബാവയുടെ തൃപ്പാദസ്പർശനത്താൽ അനുഗ്രഹീതമായ ചക്കാലക്കുടിചാപ്പലിൽ ധൂപപ്രാർത്ഥനയ്ക്കുശേഷം 4 മണിക്ക് പ്രദക്ഷിണമായി പള്ളിയിലെത്തി കബറിങ്കൽ ഏലിയാസ് മോർ യൂലിയോസ് തിരുമേനിയുടെ മുഖ്യകാർമ്മികത്വത്തിൽ ധൂപപ്രാർത്ഥനയ്‌ക്കുശേഷമാണ് മാർതോമ ചെറിയ പള്ളിവികാരി ഫാ. ജോസ് പരുത്തുവയലിൽ കൊടിയേറ്റിയത്.
കോതമംഗലം മേഖല മെത്രാപ്പൊലീത്ത ഏലിയാസ് മോർ യൂലിയോസ് തിരുമേനി, ഡീൻ കുര്യാക്കോസ് എം.പി, എം.എൽ.എമാരായ ആന്റണി ജോൺ, മാത്യു കുഴൽനാടൻ, എൽദോസ് കുന്നപ്പിള്ളി, ഡി.സി.സി പ്രസിഡന്റ് മുഹമ്മദ് ഷിയാസ്, കോതമംഗലം മുനിസിപ്പൽ ചെയർമാൻ കെ.കെ. ടോമി, വൈസ് ചെയർപേഴ്സൺ സിന്ധു ഗണേഷ്, ബ്ലോക്ക് പഞ്ചായത്ത് പ്രസിഡന്റ് പി.എ.എം. ബഷീർ, മുൻമന്ത്രി ഷെവ.ടി.യു. കുരുവിള, മതമൈത്രി സംരക്ഷണസമിതി പ്രസിഡന്റ് എ.ജി. ജോർജ്, കൺവീനർ കെ.എ. നൗഷാദ്, പഞ്ചായത്ത് പ്രസിഡന്റുമാരായ പി.കെ. ചന്ദ്രശേഖരൻ നായർ, മാമച്ചൻ, ജെസി സാജു, ഷിബു തെക്കുംപുറം, ഇ.കെ. സേവ്യർ, മൈതീൻ ഇഞ്ചക്കുടി, എൽദോസ് ചേലാട്ട്, മുൻസിപ്പൽ കൗൺസിലർമാർ, പഞ്ചായത്ത് മെമ്പർമാർ, ചെറിയപള്ളി സഹവികാരിമാരായ ഫാ. ജോസ് തച്ചേത്കുടി, ഫാ. ഏലിയാസ് പൂമറ്റത്തിൽ, ഫാ. ബിജോ കാവാട്ട്, ഫാ. ബേസിൽ ഇട്ടിയാണിക്കൽ, ട്രസ്റ്റിമാരായ ബേബി ആഞ്ഞിലിവേലിൽ, ഏലിയാസ് കീരംപ്ലായിൽ, സലീം ചെറിയാൻ മാലിൽ, ബേബി പാറേക്കര, ബിനോയി തോമസ് മണ്ണൻചേരി, എബി ചേലാട്ട്, ഡോ. റോയി മാലിൽ, മാനേജിംഗ് കമ്മിറ്റി അംഗങ്ങൾ, ഭക്തസംഘടനാ പ്രവർത്തകർ, നാനാ ജാതിമതസ്ഥരായ വിശ്വാസിസമൂഹം എന്നിവർ പങ്കെടുത്തു.