കൊച്ചി: കൊച്ചിയുടെ തീരദേശമേഖലയുടെ സംരക്ഷണത്തിനായി പ്രത്യേക കണ്ടൽക്കാട് പദ്ധതിക്ക് തുടക്കമായി. ഡി.പി വേൾഡാണ് 'മാംഗ്രോവ്‌സ് ഇനിഷ്യേറ്റീവ് ഇൻ എറണാകുളം' പദ്ധതിക്ക് തുടക്കമിട്ടത്. വൈപ്പിനിലെ പള്ളിപ്പുറം, കുഴിപ്പിള്ളി, കടമക്കുടി, ഞാറക്കൽ എന്നീ പഞ്ചായത്തുകളിലുള്ള 50 ഏക്കറിൽ കണ്ടൽക്കാട് നടീലും അതിന്റെ പരിരക്ഷണവുമാണ് ഡി.പി വേൾഡ് ഏറ്റെടുക്കുന്നത്. അടുത്ത മൂന്ന് വർഷത്തിനുള്ളിൽ കൊച്ചിയുടെ തീരങ്ങളിൽ 1,00,000 കണ്ടൽ തൈകൾ ഡി.പി വേൾഡ് നടും.

ദീർഘകാലം അവയുടെ സംരക്ഷണവും ഏറ്റെടുക്കും. ഇതിനായി തീരദേശജനവിഭാഗങ്ങളെക്കൂടി ഉൾപ്പെടുത്തിയുള്ള സാമൂഹികാധിഷ്ഠിത കർമപരിപാടിക്കും രൂപം നൽകും. കണ്ടൽക്കാടുകളെ സംരക്ഷിക്കുന്നതിനും അവയുടെ വ്യാപനത്തിനും സർക്കാർ നടത്തുന്ന നിരവധി ചുവടുവെയ്പ്പുകളുടെ ഭാഗമായാണ് പദ്ധതി. പദ്ധതിയുടെ ഉദ്ഘാടനം കെ.എൻ. ഉണ്ണികൃഷ്ണൻ എം.എൽ.എ ഉദ്ഘാടനം ചെയ്തു.

ഡി.പി വേൾഡ് പോർട്‌സ് ആൻഡ് ടെർമിനൽസ് ഓപ്പറേഷൻസ് ആൻഡ് എൻജിനിയറിംഗ് വിഭാഗം സീനിയർ ഡയറക്ടർ ദിപിൻ കയ്യാത്ത്, കടമക്കുടി പഞ്ചായത്ത് പ്രസിഡന്റ് മേരി വിൻസെന്റ്, കുസാറ്റ് സ്‌കൂൾ ഒഫ് ഇൻഡസ്ട്രിയൽ ഫിഷറീസ് വിഭാഗം പ്രൊഫ. ഡോ.എം. ഹരികൃഷ്ണൻ, ജില്ലാ പഞ്ചായത്ത് വൈസ് പ്രസിഡന്റ് അഡ്വ. എൽസി ജോർജ്, കുഴുപ്പിള്ളി പഞ്ചായത്ത് പ്രസിഡന്റ് കെ.എസ്. നിബിൻ, പള്ളിപ്പുറം പഞ്ചായത്ത് പ്രസിഡന്റ് രമണി അജയൻ, ഞാറക്കൽ പഞ്ചായത്ത് പ്രസിഡന്റ് മിനി രാജു, കടമക്കുടി പഞ്ചായത്ത് വൈസ് പ്രസിഡന്റ് വിപിൻ രാജ് എന്നിവർ പദ്ധതിയുടെ ഉദ്ഘാടന ചടങ്ങിൽ സംബന്ധിച്ചു.

വിദേശത്തും കണ്ടൽക്കാടുകളുടെ സംരക്ഷകർ

1. വിദേശ രാജ്യങ്ങളിലും കണ്ടൽക്കാടുകളുടെ സംരക്ഷണത്തിനായി നിരവധി പദ്ധതികൾ ഡി.പി വേൾഡ് നടത്തുന്നുണ്ട്.

2. കാലിസർ ഫൗണ്ടേഷനുമായി ചേർന്ന് 2017 മുതൽ ഇക്വഡോറിന് സമീപമുള്ള പൊസോർജയുടെ പുന ദ്വീപിൽ 105 ഹെക്ടറോളം വരുന്ന ചതുപ്പുനിലങ്ങളിൽ ഇതുവരെ 2,18,000 തൈകൾ നട്ടുകഴിഞ്ഞു. ഈ വർഷം അവസാനത്തോടെ 32,000 തൈകൾ കൂടി നടും.

3. 2023ൽ യു.എ.ഇ പാരിസ്ഥിതിക-കാലാവസ്ഥാ വൃതിയാന മന്ത്രാലയുമായി സഹകരിച്ച്, മാംഗ്രോവ് അലയൻസ് ഫോർ ക്ലൈമറ്റ് ഉദ്യമത്തിന്റെ ഭാഗമാണ്. 2024 മുതൽ യു.എൻ.ജി.സി തുടങ്ങിയ ആഗോള മാംഗ്രോവ് ബ്രേക്ക്ത്രൂ പദ്ധതിക്കുമൊപ്പമുണ്ട്.

പൊക്കാളി കൃഷിയെ പ്രോത്സാഹിപ്പിക്കുക, സമുദ്രത്തിന്റെയും കായൽ മേഖലയുടെയും ജൈവ സമ്പത്തിനെ സംരക്ഷിക്കാനുതകുന്ന കണ്ടൽക്കാട് സംരക്ഷണം തുടങ്ങിയവ ലക്ഷ്യം വെച്ചുള്ള മഹത്തായ സംരംഭമാണിത്

കെ.എൻ. ഉണ്ണികൃഷ്ണൻ എം.എൽ.എ

കടൽത്തീരവുമായി ബന്ധപ്പെട്ട് ജീവിക്കുന്നവർക്ക് സുസ്ഥിരമായ ഒരു ഭാവി പടുത്തുയർത്തുന്നതിനുള്ള ഡി.പി വേൾഡിന്റെ ശ്രമങ്ങളുടെ ഭാഗമാണ് പദ്ധതി

പ്രവീൺ ജോസഫ്,
സി.ഇ.ഒ,
ഡി.പി വേൾഡ് കൊച്ചി പോർട്‌സ് ആൻഡ് ടെർമിനൽ