പെരുമ്പാവൂർ: ദേശീയ ജന്തുജന്യ രോഗ നിയന്ത്രണ പദ്ധതിയുടെ ഭാഗമായി ബ്രൂസെല്ല പ്രതിരോധ കുത്തിവെപ്പ് പദ്ധതി മൂന്നാംഘട്ടം ആരംഭിച്ചു. മൃഗങ്ങളിൽ നിന്ന് മനുഷ്യരിലേക്ക് പകരുന്ന ബ്രൂസല്ലോസിസ് രോഗപ്രതിരോധത്തിനായി ജില്ലയിൽ കുത്തിവെപ്പ് ക്യാമ്പുകൾ ആരംഭിച്ചു. തുടർച്ചയായി അഞ്ചു ദിവസം നീളുന്ന ക്യാമ്പിലൂടെ പൂർണരോഗ നിയന്ത്രണമാണ് ലക്ഷ്യമിടുന്നത്. നാല് മുതൽ എട്ടുമാസം വരെ പ്രായമുള്ള പശു, എരുമ കിടാക്കൾക്കാണ് പ്രതിരോധ മരുന്ന് നൽകുന്നത്. നിയന്ത്രണ പദ്ധതിയുടെ ഭാഗമായി പ്രതിരോധത്തിന്റെ മൂന്നാംഘട്ടത്തിലാണ് ജില്ലയിൽ തുടക്കമായത്. മൃഗസംരക്ഷണ ഉദ്യോഗസ്ഥരുടെ 89 സ്ക്വാഡുകൾ ക്യാമ്പിന് വേണ്ടി രൂപീകരിച്ചിട്ടുണ്ട്. ജില്ലാ പഞ്ചായത്ത് പ്രസിഡന്റ് മനോജ് മൂത്തേടൻ പ്രതിരോധ കുത്തിവെപ്പ് പദ്ധതി മൂന്നാം ഘട്ടം ഉദ്ഘാടനം ചെയ്തു. കൂവപ്പടി പഞ്ചായത്ത് പ്രസിഡന്റ് മായ കൃഷ്ണകുമാ‌ർ അദ്ധ്യക്ഷയായി. ജില്ലാ മൃഗസംരക്ഷണ ഓഫീസർ ഡോ. ജി. സജികുമാർ മുഖ്യപ്രഭാഷണം നടത്തി. എ.ഡി.സി.പി ജില്ലാ കോർഡിനേറ്റർ ഡോ. ബിജു ജെ. ചെമ്പരത്തി, ബ്ലോക്ക് പഞ്ചായത്ത് പ്രസിഡന്റ് എ.ടി. അജിത് കുമാർ, ജില്ലാ പഞ്ചായത്ത് മെമ്പർ ഷൈമി വർഗീസ്, കൂവപ്പടി ഗ്രാമപഞ്ചായത്ത് വൈസ് പ്രസിഡന്റ് എം.ഒ. ജോസ്, കോടനാട് വെറ്ററിനറി സർജൻ ഡോ. അർച്ചന, താലൂക്ക് കോ ഓർഡിനേറ്റർ ഡോ. ബിജു കെ. വർഗീസ് തുടങ്ങിയവർ സംസാരിച്ചു.