കോതമംഗലം: കോതമംഗലം കന്നി 20 പെരുന്നാൾ പ്രമാണിച്ച് കോതമംഗലം നഗരത്തിൽ ബുധനാഴ്ച ഉച്ച മുതൽ ഗതാഗത നിയന്ത്രണം ഏർപ്പെടുത്തും. നേര്യമംഗലം ഭാഗത്ത് നിന്നുള്ള ചെറിയ വാഹനങ്ങൾ ശോഭന സ്കൂളിന്റെ ഗ്രൗണ്ടിലും സെന്റ് ജോർജ് സ്കൂളിന്റെ ഗ്രൗണ്ടിലും പാർക്ക് ചെയ്യണം. മൂന്നാർ, അടിമാലി, വാരപ്പെട്ടി മുതലായ ഭാഗത്ത് നിന്ന് വരുന്ന പ്രൈവറ്റ്, കെ.എസ്.ആർ.ടി.സി ബസുകൾ അരമനപ്പടിയിൽ നിന്ന് തിരിഞ്ഞ് മലയിൻകീഴ് ബൈപാസ് വഴി ഗ്യാസ് ഗോഡൗൺ ഭാഗം കൂടി പ്രൈവറ്റ് സ്റ്റാൻഡിൽ പ്രവേശിക്കണം. കുട്ടമ്പുഴ, ഭൂതത്താൻകെട്ട് ഭാഗത്ത് നിന്ന് വരുന്ന ബസുകളും ബൈപാസ് വഴി ഗ്യാസ് ഗോഡൗൺ ഭാഗം കൂടി പ്രൈവറ്റ് സ്റ്റാൻഡിൽ പ്രവേശിക്കണം. ആലുവ, പെരുമ്പാവൂർ ഭാഗത്ത് നിന്നും വരുന്ന ബസുകൾ നെല്ലിക്കുഴിയിൽ നിന്ന് ഗ്രീൻവാലി സ്കൂൾ വഴി ബൈപാസിൽ എത്തിച്ചേർന്ന് രാജീവ് ഗാന്ധി റോഡ് വഴി സ്റ്റാൻഡിൽ പ്രവേശിക്കേണ്ടതാണ്. മൂവാറ്റുപുഴ ഭാഗത്ത് നിന്നും കോതമംഗലം വരെയുള്ള ബസുകൾ നേരെ പി.ഒ ജംഗ്ഷൻ വഴി സ്റ്റാൻഡിൽ പ്രവേശിച്ച് തിരികെ തങ്കളം ലോറി സ്റ്റാൻഡ് വഴി കല ഓഡിറ്റോറിയത്തിന് സമീപത്തുള്ള ജംഗ്ഷനിലൂടെ തിരിച്ച് മുവാറ്റുപുഴയ്ക്ക് പോകാവുന്നതാണ്. മൂവാറ്റുപുഴയിൽ നിന്ന് വരുന്ന തീർത്ഥാടക വാഹനങ്ങൾ എം.എ കോളേജ് ഭാഗത്ത് പാർക്ക് ചെയ്യാം. തീർത്ഥാടകരുടെ വലിയ വാഹനങ്ങൾ തങ്കളം ജംഗഷനിൽ കൂടി പ്രവേശിച്ച് കാക്കനാട് ബൈപാസിൽ പാർക്ക് ചെയ്യാവുന്നതാണ്. മൂവാറ്റുപുഴ ഭാഗത്ത് നിന്ന് ഹൈറേഞ്ചിലേക്ക് പോകുന്ന ദീർഘദൂര വാഹനങ്ങൾ പുതുപ്പാടി – വാരപ്പെട്ടി- അടിവാട് – ഊന്നുകൽ വഴി പോകേണ്ടതാണ്. ബുധൻ ഉച്ചയ്ക്ക് 2മുതൽ വ്യാഴം വൈകുന്നേരം 4 വരെയാണ് ഗതാഗത നിയന്ത്രണം.