കൊച്ചി: സർക്കാരിന്റെ പക പോക്കൽ നടപടികളെ തുടർന്ന് നാല് വർഷം സർവീസ് ബാക്കി നിൽക്കേ പൊലീസ് ഇൻസ്പെക്ടർ സ്വയം സർവീസിൽ നിന്ന് വിരമിച്ചു. ഇടപ്പള്ളി ട്രാഫിക് സ്റ്റേഷനിലെ ഇൻസ്പെക്ടർ പി.ആർ. സരീഷാണ് ഇന്നലെ സർവീസ് അവസാനിപ്പിച്ച് സേനയുടെ പടിയിറങ്ങിയത്.

ഏറെക്കാലം വി​ജി​ലൻസി​ലായി​രുന്ന ഇദ്ദേഹം കെ.എം. മാണി​ക്കെതി​രായ കേസി​ൽ അന്വേഷണ ഉദ്യോഗസ്ഥനായി​രുന്നു. അന്ന് സ്വീകരി​ച്ച നടപടി​കളുടെ പേരി​ൽ പ്രൊമോഷനുൾപ്പെടെ തടഞ്ഞി​ട്ടി​രി​ക്കുകയായി​രുന്നത്രെ.

തൃശൂർ വിജിലൻസ് ഇൻസ്പെക്ടറായിരിക്കെ ലൈഫ് മിഷൻ കേസിൽ പ്രാഥമിക അന്വേഷണം നടത്തിയതും സരീഷാണ്. 2014ൽ പാറ്റൂർ ഭൂമി ഇടപാടുകേസിലെ അന്വേഷണസംഘത്തിലും അംഗമായിരുന്നു. ജൂനി​യർ ഓഫീസർമാർക്ക് കീഴി​ൽ ജോലി​ ചെയ്യേണ്ട അവസ്ഥയും ഉണ്ടായി​ട്ടുണ്ട്. മാസങ്ങളായി​ ശമ്പളമി​ല്ലാത്ത അവധി​യി​ലുമായി​രുന്നു.

തൃശൂർ സ്വദേശിയായ ഇദ്ദേഹത്തിന്റെ വിരമിക്കൽ അപേക്ഷ അംഗീകരിച്ച് പൊലീസ് മേധാവി ഷെയ്ക്ക് ദർവേഷ് സാഹബ് ഈ മാസം 23ന് ഉത്തരവിറക്കി. 2028 മേയിലാണ് പെൻഷനാകേണ്ടത്. 20 വർഷവും പത്ത് മാസവും സേനയിലുണ്ടായിരുന്നു. യാത്രയയപ്പോ ഉപഹാരം നൽകലോ വേണ്ടെന്ന് സരീഷ് സഹപ്രവർത്തകരെ അറിയിച്ചിരുന്നു. ഇന്നലെ സ്റ്റേഷനിലെ എസ്.ഐയ്ക്ക് വിരമിക്കൽ ചടങ്ങ് ഒരുക്കിയിരുന്നെങ്കിലും ഇദ്ദേഹം പങ്കെടുത്തില്ല.