കട്ടപ്പന :കല്യാണത്തണ്ട് കയറ്റത്തിൽ ഓട്ടോറിക്ഷ മറിഞ്ഞ് 2 പേർക്ക് പരിക്കേറ്റു.
കല്യാണത്തണ്ടിലേക്കുള്ള കുത്തനെയുള്ള കയറ്റത്തിലാണ് ഓട്ടോ മറിഞ്ഞത്. കട്ടപ്പനയിൽ നിന്നും യാത്രികരുമായി എത്തിയ ടാക്സി ഓട്ടോ കയറ്റത്തിൽ നിയന്ത്രണം നഷ്ടമായി മറിയുകയായിരുന്നു. അപകടത്തിൽ കല്യാണത്തണ്ട് സ്വദേശികളായ 2 പേർക്ക് നിസാര പരിക്കേറ്റു. കഴിഞ്ഞ മാസം ഇതേ സ്ഥലത്ത് ഓട്ടോറിക്ഷ മറിഞ്ഞ് ഡ്രൈവർ മരിച്ചിരുന്നു. അതോടൊപ്പം ഇറക്കത്തിൽ ഇരുചക്രവാഹനം നിയന്ത്രണം നഷ്ടപ്പെട്ട് രണ്ടുപേർക്ക് പരിക്കേൽക്കുകയും ചെയ്തു. രണ്ട് മാസം മുൻപ് ലോറി മറിഞ്ഞും അപകടം നടന്നിരുന്നു.
കുത്തനെയുള്ള കയറ്റവും റോഡിന്റെ അശാസ്ത്രീയ നിർമ്മാണവും വീതിക്കുറവും ഐറിഷ് ഓടയുടെ അഭാവവുമാണ് ഇവിടെ പതിവായി അപകടങ്ങൾക്കിടയാക്കുന്നത്.