തൊടുപുഴ: പി.ജെ. ജോസഫ് എം.എൽ.എയുടെ നേതൃത്വത്തിൽ സ്‌കൂൾ വിദ്യാർത്ഥികൾക്കായി സൗജന്യ സിവിൽ സർവ്വീസ് പരിശീലന പരിപാടി 'ദിശ' ഗാന്ധി ജയന്തി ദിനത്തിൽ ആരംഭിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. തൊടുപുഴ നിയോജക മണ്ഡലത്തിൽ നിന്ന് അടുത്ത പത്തു വർഷത്തിനുള്ളിൽ കേന്ദ്ര- സംസ്ഥാന സർക്കാരുകളിലെ ഉന്നത പദവികളിലേയ്ക്കുള്ള മത്സര പരീക്ഷകൾക്ക് വിദ്യാർത്ഥികളെ പ്രാപ്തരാക്കുകയാണ് പദ്ധതിയുടെ ലക്ഷ്യം. തിരുവനന്തപുരം കേന്ദ്രമാക്കി പ്രവർത്തിക്കുന്ന അബ്‌സൊല്യൂട്ട് ഐ.എ.എസ് അക്കാദമി ഡയറക്ടർ ഡോ. ജോബിൻ കൊട്ടാരം പരിശീലനത്തിന് നേതൃത്വം നൽകും. നിയോജക മണ്ഡലത്തിലെ 75 സ്‌കൂളുകളെ പദ്ധതിയെക്കുറിച്ച് അറിയിച്ചിട്ടുണ്ട്. ഓൺലൈൻ പരീക്ഷയുടെ അടിസ്ഥാനത്തിൽ തിരഞ്ഞെടുക്കപ്പെടുന്ന ഏഴ്, എട്ട്, ഒമ്പത് ക്ലാസുകളിൽ പഠിക്കുന്ന 50 വിദ്യാർത്ഥികൾക്കാണ് 'ദിശ' പദ്ധതിയുടെ ഭാഗമാകാൻ സാധിക്കുന്നത്. രജിസ്‌ട്രേഷന് 6238407078 എന്ന നമ്പറിലോ, absoluteissacademy@gmail.com എന്ന ഇ- മെയിൽ വിലാസത്തിലോ ബന്ധപ്പെടണം. സിവിൽ സർവ്വീസ് ആപ്ടി‌ട്യൂട്ട് കറന്റ് അഫയേഴ്സ്, പേഴ്സാണിലിറ്റി ഡെവലപ്‌മെന്റ് സെഷനുകൾ, പൊതുവിജ്ഞാനം, കമ്മ്യൂണിക്കേറ്റീവ് ഇംഗ്ലീഷ് സെഷനുകൾ, കോൺഫിഡൻസ് ബിൽഡിങ് പ്രോഗ്രാമുകൾ, ലോജിക്കൽ റീസണിങ്, റീഡിങ് കോംപ്രിഹെൻഷൻ എന്നിവയൊക്കെ ഉൾക്കൊള്ളിച്ചാണ് 'ദിശ' പദ്ധതി നടപ്പിലാക്കുന്നത്.
അബ്‌സൊല്യൂട്ട് ഐ.എ.എസ് അക്കാദമിയുടെയും കേരളാ ഐ.ടി ആൻഡ് പ്രൊഫഷണൽ കോൺഗ്രസിന്റെയും സഹകരണത്തോടെയാണ് സൗജന്യ സിവിൽ സർവ്വീസ് പരിശീലന പരിപാടി സംഘടിപ്പിക്കുന്നത്. വാർത്താസമ്മേളനത്തിൽ എ.ടി ആൻഡ് പ്രൊഫഷണൽ കോൺഗ്രസ് സംസ്ഥാന പ്രസിഡന്റ് അപു ജോൺ ജോസഫ്, അഡ്വ. ജോസി ജേക്കബ്, ജെയ്സ് ജോൺ, ഡോ. ജോബിൻ കൊട്ടാരം, ജെയ്സൺ ഓലിക്കൽ എന്നിവർ പങ്കെടുത്തു.