ഇടുക്കി : മൂന്നാറിലെ ടൂറിസം മേഖല നേരിടുന്ന വിവിധങ്ങളായ പ്രശ്നങ്ങൾ കൂട്ടായ പരിശ്രമത്തിലൂടെ പരിഹരിക്കുന്നതിന് കേരള ടൂറിസം വർക്കേഴ്സ് കോൺഗ്രസ് നേതൃത്വത്തിൽ ടൂറിസം സമ്മിറ്റ് വിളിച്ച് കൂട്ടുമെന്ന് സംസ്ഥാന വൈസ് പ്രസിഡന്റ് സണ്ണി ഇലഞ്ഞിക്കൽ പറഞ്ഞു. ടൂറിസം വർക്കേഴ്സ് കോൺഗ്രസ് പ്രസിഡന്റും ഐ എൻ ടി യു സി സംസ്ഥാന പ്രസിഡന്റുമായ ആർ ചന്ദ്രശേഖരൻ, മുൻ എം.എൽ.എ എ.കെ. മണി നേതൃത്വത്തിലായിരിക്കും സമ്മിറ്റ്. പ്രധാന ടൂറിസം ഡെസ്റ്റിനേഷനായി മൂന്നാർ വികസിച്ചുവെങ്കിലും അതനുസരിച്ച് അടിസ്ഥാന സൗകര്യങ്ങൾ വികസിച്ചിട്ടില്ല. ടൂറിസം മാസ്റ്റർ പ്ലാൻ ഇല്ലാത്തതും വലിയ ദോഷമാണ്.ഇത് മൂലം അതിഥികൾ നിരാശരായി മടങ്ങുകയോ അടുത്ത പ്രദേശങ്ങളിലേക്ക് പോകുകയും ചെയ്യുന്നു. സഞ്ചാരികൾക്ക് സംതൃപ്തിയും മൂന്നാറുകാർക്ക് ജീവനോപാധിയും എന്ന നിലയിലേക്ക് ടൂറിസം മാറണം. മൂന്നാർ, ദേവികുളം, ചിന്നക്കനാൽ, വട്ടവട പഞ്ചായത്തുകളുടെ കലാവസ്ഥയും ഭൂപ്രകൃതിയും സമാനമായതിനാൽ ഈ പ്രദേശങ്ങളെ ഒരു ക്ലസ്റ്ററായും മറയൂർ, കാന്തല്ലൂർ പഞ്ചായത്തുകളെയും പള്ളിവാസൽ,മാങ്കുളം, ബൈസൺവാലി തുടങ്ങിയ പഞ്ചായത്തുകളെയും വെവ്വേറെ ക്ലസ്റ്ററുകളാക്കിയുമാണ് മാസ്റ്റർ പ്ലാൻ തയ്യാറാക്കേണ്ടത്. ജനപ്രതിനിധികൾ, രാഷ്ട്രീയ പ്രതിനിധികൾ, ടൂറിസം മേഖലയിൽ പ്രവർത്തിക്കുന്ന വിവിധ സംഘടനകൾ , ഹോട്ടലുകൾ, എന്നിവരുടെ പ്രതിനിധികൾ, വിദഗ്ധർ തുടങ്ങിയവരെയും പങ്കെടുപ്പിക്കുമെന്നും ടൂറിസവും സമാധാനവും എന്ന ലോക ടൂറിസം ദിന സന്ദേശം ഉൾക്കൊണ്ടായിരിക്കും ഭാവി പരിപാടികൾ ആസൂത്രണം ചെയ്യുമെന്നും സണ്ണി അറിയിച്ചു.