തൊടുപുഴ: ബൈക്കുകൾ കൂട്ടിയിടിച്ചുണ്ടായ അപകടത്തിൽ പരിക്കേറ്റ യുവാവ് മരിച്ചു. ആലക്കോട് കോളാപ്പിള്ളിൽ പരേതനായ ശ്രീധരന്റെ മകൻ അനന്തുവാണ് (22) മരിച്ചത്. ഞായറാഴ്ച രാത്രി പത്തോടെ മീൻമുട്ടിക്കും ആലക്കോട് നാഗാർജുനയ്ക്കും ഇടയിലുള്ള വളവിലായിരുന്നു അപകടം. ബൈക്കുകൾ കൂട്ടിയിടിക്കുന്നത് കണ്ട് പിന്നാലെ വന്ന കാർ വെട്ടിച്ച് മാറ്റുന്നതിനിടെ വൈദ്യുതി പോസ്റ്റിൽ ഇടിച്ച് പോസ്റ്റ് തകർന്നതായി പൊലീസ് പറഞ്ഞു. അപകടത്തിൽ തലയ്ക്ക് സാരമായി പരിക്കേറ്റ അനന്തുവിനെ ആശുപത്രിയിൽ പ്രവേശിപ്പിച്ചെങ്കിലും ഇന്നലെ രാവിലെ മരിച്ചു. സംസ്‌കാരം ഇന്ന് ഉച്ചയ്ക്ക് രണ്ടിന് നടക്കും. കാറ്ററിങ് ജോലിക്കാരനായിരുന്നു. ഇന്ദുവാണ് അമ്മ. സഹോദരങ്ങൾ: ഗാംഗോ, ശംഭു.

ആലക്കോട് റോഡിൽ അപകടം ഉണ്ടായ വളവിൽ അപകടങ്ങൾ പതിവാകുന്നതായി നാട്ടുകാർ പറഞ്ഞു. വീതി കുറവും വളവും അപകടം വർദ്ധിക്കാൻ ഇടയാക്കുകയാണ്.