എളേരി: എളേരിത്തട്ട് ഇ.കെ.നായനാർ മെമ്മോറിയൽ സർക്കാർ കോളേജ് നിർമ്മാണത്തിന് ഭൂമി സൗജന്യമായി നൽകിയ അപ്പുനായരുടെ പുരയിടത്തിലേക്ക് റോഡ് ലഭ്യമാക്കുമെന്ന് ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ ബിന്ദു പറഞ്ഞു. എം.എൽ.എമാരായ എം.രാജഗോപാലന്റെയും ഇ.ചന്ദ്രശേഖരന്റേയും സാന്നിധ്യത്തിൽ വിളിച്ചുചേർത്ത യോഗം ഇതിനായുള്ള നടപടി ക്രമങ്ങൾക്ക് ധാരണയുണ്ടാക്കിയതായും മന്ത്രി അറിയിച്ചു. അപ്പുനായരുടെ പുരയിടത്തിലേക്ക് നാല് മീറ്റർ വീതിയിലാണ് റോഡ് ലഭ്യമാക്കുക. കോളേജിന്റെ മതിൽ 54 മീറ്റർ നീളത്തിൽ പൊളിച്ച ശേഷം നാല് മീറ്റർ ഉള്ളിലേക്ക് മാറ്റി പുനർ നിർമ്മിക്കാൻ കോളേജ് വിദ്യാഭ്യാസ ഡയറക്ടർ നടപടി സ്വീകരിക്കും. കോളേജ് വിദ്യാഭ്യാസ ഡയറക്ടർ കെ.സുധീർ, കോളേജ് പ്രിൻസിപ്പൽ ഡോ. മാത്യൂസ് പ്ലാമൂട്ടിൽ, അപ്പു നായരുടെ മകൻ ഭുവനേന്ദ്രൻ, ആർ.ഡി.ഒ സീനിയർ സൂപ്രണ്ട് പി.എസ് വിനോദ് കുമാർ,

സി.പി ബാബു എന്നിവരും യോഗത്തിൽ പങ്കെടുത്തു.