@ബേസിൽ ജോസഫ് സൂപ്പർ ലീഗ് കേരള ഫുട്ബോൾ കാലിക്കറ്റ് എഫ്.സിയുടെ ബ്രാൻഡ് അംബാസിഡർ
കോഴിക്കോട്: സംവിധായകനും ചലച്ചിത്രതാരവുമായ ബേസിൽ ജോസഫ് സൂപ്പർ ലീഗ് കേരള ഫുട്ബോൾ കാലിക്കറ്റ് എഫ്.സിയുടെ ബ്രാൻഡ് അംബാസിഡറായി. ഇന്ന് നടക്കുന്ന കാലിക്കറ്റ് എഫ്.സിയുടെ ആദ്യ മത്സരം കാണാനും ടീമിനെ പ്രോത്സാഹിപ്പിക്കാനും ബേസിൽ ജോസഫും കോഴിക്കോട് ഇ.എം.എസ് കോർപറേഷൻ സ്റ്റേഡിയത്തിലെത്തും. തിരുവനന്തപുരം കൊമ്പൻസുമായാണ് കാലിക്കറ്റ് എഫ്.സിയുടെ ആദ്യമത്സരം. ആദ്യ മാച്ചിന്റെ ടിക്കറ്റ് വിൽപ്പനയിൽ നിന്നും നടക്കുന്ന നറുക്കെടുപ്പിന്റെ സമ്മാനദാനവും മത്സരവേദിയിൽ വച്ച് ബേസിൽ നിർവഹിക്കും.
മത്സരത്തിനുള്ള ടിക്കറ്റ് പേ.ടി.എം ഇൻസൈഡർ ആപ്പ് വഴി ബുക്ക് ചെയ്യാം. വൈകുന്നേരം ഏഴ് മണി മുതലാണ് മത്സരം. കാലിക്കറ്റ് എഫ്.സി യ്ക്ക് അഞ്ച് ഹോം മാച്ചുകളാണുള്ളത്. അന്താരാഷ്ട്ര പ്രശസ്തനായ ഇയാൻ ആൻഡ്രൂ ഗിലിയനാണ് കാലിക്കറ്റ് എഫ്.സി യുടെ കോച്ച്. സന്തോഷ് ട്രോഫിക്കുള്ള കേരള ടീമിന്റെ കോച്ചായി തെരഞ്ഞെടുത്ത ബിബി തോമസ് മുട്ടത്താണ് കാലിക്കറ്റ് എഫ്‌സിയുടെ അസിസ്റ്റന്റ് കോച്ച്. കൊച്ചി, കോഴിക്കോട്, തിരുവനന്തപുരം, മഞ്ചേരി എന്നിവിടങ്ങളിലായാണ് രണ്ടുമാസം നീണ്ടുനിൽക്കുന്ന ഫുട്ബോൾ മത്സരങ്ങൾ നടക്കുന്നത്. കോഴിക്കോട്ടെ ഇ.എം.എസ് കോർപ്പറേഷൻ സ്റ്റേഡിയത്തിലാണ് ഏറ്റവുമധികം മത്സരങ്ങൾ നടക്കുന്നത്. നവംബർ അഞ്ചിന നടക്കുന്ന ആദ്യ സെമി ഫൈനൽ ഉൾപ്പെടെ ആകെയുള്ള 33 മത്സരങ്ങളിൽ 11 എണ്ണത്തിന് കോഴിക്കോട് സാക്ഷ്യം വഹിക്കും. നവംബർ 10ന് കൊച്ചിയിലാണ് ഫൈനൽ. സ്റ്റാർ പ്ലസിലും ഡിസ്‌നി പ്ലസ് ഹോട്ട് സ്റ്റാറിലും തത്സമയ സംപ്രേഷണം ഉണ്ടാകും.
മത്സരത്തിന്റെ ഷെഡ്യൂൾ
കാലിക്കറ്റ് എഫ്സി X തിരുവനന്തപുരം കൊമ്പൻസ്(സെപ്തംബർ 10)
കാലിക്കറ്റ് എഫ്സി X കൊച്ചി ഫോർക എഫ്സി (സെപ്തംബർ 18)
കാലിക്കറ്റ് എഫ്സി X തൃശൂർ മാജിക്ക് എഫ്സി (സെപ്തംബർ 24)
കാലിക്കറ്റ് എഫ്സി X കണ്ണൂർ വാരിയേഴ്‌സ് എഫ്സി (സെപ്തംബർ 28)
കാലിക്കറ്റ് എഫ്സി X മലപ്പുറം എഫ്സി (ഒക്ടോബർ 12)