കോഴിക്കോട്: കോൺഗ്രസ് നേതൃത്വം നൽകുന്ന ചേവായൂർ സഹകരണ ബാങ്ക് ഭരണസമിതിക്കെതിരെ യൂത്ത് കോൺഗ്രസ് പ്രതിഷേധം. ബാങ്കിൽ നടത്തുന്ന അഴിമതി നിയമനങ്ങൾക്കെതിരെയാണ് ഇന്നലെ യൂത്ത് കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ ബാങ്ക് ഹെഡ് ഓഫീസ് ഉപരോധിച്ചത്. സി.പി.എമ്മുമായി ബാങ്ക് ഭരണസമിതി അവിശുദ്ധ സഖ്യം സൂക്ഷിക്കുന്നു എന്നാരോപിച്ചായിരുന്നു സമരം.

ബാങ്ക് ഭരണസമിതി സ്വന്തക്കാർക്കും ബന്ധുക്കൾക്കും ജോലി നൽകുന്നതിലും കോഴവാങ്ങി നിയമനങ്ങൾ നടത്തുന്നതിലും പ്രതിഷേധിച്ചാണ് സമരം നടത്തിയതെന്ന് നേതാക്കൾ പറഞ്ഞു. നിലവിലെ ഒഴിവുകളിലേക്ക് മുമ്പ് നടത്തിയ പരീക്ഷയുടെ മാർക്ക് മാനദണ്ഡം അട്ടിമറിച്ച് സ്വന്തക്കാരെ നിയമിക്കാൻ സുതാര്യത ഇല്ലാതെ ഇന്റർവ്യു നടത്തുന്നത് അറിഞ്ഞാണ് തങ്ങൾ ഉപരോധസമരവുമായി എത്തിയതെന്ന് യൂത്ത് കോൺഗ്രസ് ജില്ലാ നേതാക്കൾ പറഞ്ഞു.

ഉപരോധസമരം എൻ.എസ്.യു ദേശീയ ജനറൽ സെക്രട്ടറി കെ.എം.അഭിജിത്ത് ഉദ്ഘാടനം ചെയ്തു. യൂത്ത് കോൺഗ്രസ് ജില്ലാ പ്രസിഡന്റ് ആർ.ഷഹിൻ അദ്ധ്യക്ഷത വഹിച്ചു. സംസ്ഥാന ജനറൽ സെക്രട്ടറിമാരായ ടി.എം.നിമേഷ്, സൂഫിയാൻ ചെറുവാടി, സംസ്ഥാന സെക്രട്ടറിമാരായ വൈശാഖ് കണ്ണോറ, വി.ടി.നിഹാൽ, കെ.എസ്.യു ജില്ലാ പ്രസിഡന്റ് വി.ടി.സൂരജ്, സംസ്ഥാന ജനറൽ സെക്രട്ടറി സനൂജ് കുരുവട്ടൂർ, യൂത്ത് കോൺഗ്രസ് ജില്ലാ ഭാരവാഹികളായ പി.ജഷീം അലി, എം.ഷിബു, പി.എം.ആഷിഖ്, ജിനീഷ് ലാൽ മുല്ലാശ്ശേരി, കെ.എം.രബിൻ ലാൽ, അസംബ്ലി പ്രസിഡന്റുമാരായ പി.പി.റമീസ്, എം.ജിതിൻ, അഭിജിത്ത് ഉണ്ണികുളം എന്നിവർ പ്രസംഗിച്ചു. സമരം നീണ്ടതോടെ പ്രവർത്തകരെ പൊലീസ് അറസ്റ്റുചെയ്ത് നീക്കി.