കൽപ്പറ്റ: മുണ്ടക്കൈ ഉരുൾപൊട്ടൽ ദുരന്തവുമായി ബന്ധപ്പെട്ട് വിവിധ പ്രവർത്തനങ്ങൾക്കായി ടി. സിദ്ധിഖ് എം.എൽ.എയുടെ നേതൃത്വത്തിൽ കൽപ്പറ്റയിൽ റിവൈവ് വയനാട് എന്ന പേരിൽ നോഡൽ ഓഫീസ് തുറന്നു. വയനാടിനെ പുനരുജ്ജീവിപ്പിക്കുക എന്ന ലക്ഷ്യവുമായാണ് ഓഫീസിന്റെ പ്രവർത്തനം. ദുരന്തനിവാരണ പ്രവർത്തനവും സമ്പൂർണ്ണ പുനരധിവാസവുമായിമായി ബന്ധപ്പെട്ടാണ് ഓഫീസ് പ്രവർത്തിക്കുക. കൽപ്പറ്റ പുതിയ ബസ്റ്റാൻഡ് പരിസരത്താണ് ഓഫീസ് പ്രവർത്തിക്കുന്നത്. പബ്ലിക് അക്കൗണ്ട്സ് കമ്മിറ്റി അദ്ധ്യക്ഷൻ എ.ഐ.സി.സി ജനറൽ സെക്രട്ടറി കെ.സി വേണുഗോപാൽ എം.പി ഉദ്ഘാടനം ചെയ്തു. പുനരുധിവാസ പ്രവർത്തനങ്ങൾ ഉൾപ്പെടെ ഓഫീസ് മേൽനോട്ടം വഹിക്കും. സ്വകാര്യ ഏജൻസിയുമായി ചേർന്ന് ഇതിനോടകം തന്നെ ദുരന്ത മേഖലയിലെ സമ്പൂർണ്ണ വിവരശേഖരണം നടത്തിക്കഴിഞ്ഞു. വിദഗ്ധരായ പത്ത് യുവതീയുവാക്കളാണ് പ്രവർത്തനങ്ങൾ നടത്തുന്നത്. വിദ്യാഭ്യാസം, ആരോഗ്യം, തൊഴിൽ, അടിസ്ഥാന സൗകര്യങ്ങൾ, എസ്.സി, എസ്.ടി എന്നീ പ്രധാന മേഖലകൾ കേന്ദ്രീകരിച്ചാണ് ഓഫീസ് പ്രധാനമായും പ്രവർത്തിക്കുക. ഉരുൾപൊട്ടൽ ദുരന്തവുമായി ബന്ധപ്പെട്ട എം.എൽ.എ കെയറും കണ്ണൂർ ജയ് ഹിന്ദ് ചാരിറ്റബിൾ ട്രസ്റ്റും സംയുക്തമായി കൽപ്പറ്റ മണ്ഡലത്തിൽ ആംബുലൻസ് സർവീസ് ആരംഭിച്ചു. കെ.സി വേണുഗോപാൽ എം.പി ഫ്ളാഗ് ഓഫ് ചെയ്തു. ആംബുലൻസിന്റെ പ്രവർത്തനങ്ങൾ രാജീവ് യൂത്ത് ഫൗണ്ടേഷൻ നിർവഹിക്കും. ഉരുൾപൊട്ടൽ മേഖലയിലുള്ളവർക്ക് സൗജന്യമായും മറ്റുള്ളവർക്ക് സൗജന്യ നിരക്കിലുമാണ് ആംബുലൻസിന്റെ സേവനം ലഭ്യമാക്കുക. കൂടാതെ നിർധനരായ രോഗികൾക്ക് ഒരു വർഷത്തേക്ക് സൗജന്യ മരുന്ന് നൽകുന്ന പദ്ധതിയും എം.എൽ.എ കെയർ ആരംഭിച്ചു. ജയ് ഹിന്ദ് ചാരിറ്റി ട്രസ്റ്റ് ആണ് ആവശ്യമായ മരുന്നുകൾ ലഭ്യമാക്കുക.

ടി. സിദ്ധിഖ് എം.എൽ.എ, എ.ഐ.സി.സി ജനറൽ സെക്രട്ടറി ദീപ ദാസ് മുൻഷി, സണ്ണി ജോസഫ് എം.എൽ.എ, കെ.പി.സി.സി സംഘടനാകാര്യ ജനറൽ സെക്രട്ടറി എം. ലിജു, ഡി.സി.സി പ്രസിഡന്റ് എൻ.ഡി അപ്പച്ചൻ, ജയ് ഹിന്ദ് ചാരിറ്റി സെന്റർ ചെയർമാൻ കെ.വി.ടി മുഹമ്മദ് കുഞ്ഞി, സെക്രട്ടറി മാവില പദ്മനാഭൻ കൽപ്പറ്റ മണ്ഡലം ചെയർമാൻ പി. കബീർ, രാജീവ് യൂത്ത് ഫൌണ്ടേഷൻ ചെയർമാൻ റഷീദ് പറമ്പൻ, ഭാരവാഹികളായ എം.എ ജോസഫ്, എൻ.ടി മാത്യു, റസാഖ് കൽപ്പറ്റ, പി.പി ആലി, എം.എ ജോസഫ് തുടങ്ങിയവർ പങ്കെടുത്തു.

ടി. സിദ്ധിഖ് എം.എൽ.എയുടെ നേതൃത്വത്തിൽ കൽപ്പറ്റയിൽ റിവൈവ് വയനാട് എന്ന പേരിൽ ആരംഭിച്ച നോഡൽ ഓഫീസിന്റെ ഉദ്ഘാടനം കെ.സി വേണുഗോപാൽ എം.പി നിർവഹിക്കുന്നു