കോഴിക്കോട്: ലോക ഹൃദയദിനാഘോഷത്തിന്റെ ഭാഗമായി കോഴിക്കോട് കോർപ്പറേഷന്റെയും കേരള ഹാർട്ട് കെയറിന്റെയും ആഭിമുഖ്യത്തിൽ ഹൃദയത്തിനുവേണ്ടി നടത്തം സംഘടിപ്പിച്ചു. കോർപ്പറേഷൻ ഓഫീസിന് മുന്നിൽ മേയർ ഡോ. ബീന ഫിലിപ്പ് ഫ്ളാഗ് ഓഫ് ചെയ്തു. വിവിധ ആശുപത്രികൾ, എൻ.സി.സി, എൻ.എസ്.എസ്, സ്‌ക്കൗട്ട് വൊളന്റിയർമാർ, റസിഡന്റ്സ് അസോസിയേഷൻ പ്രതിനിധികൾ, ലയൺസ്, റോട്ടറി ക്ലബ് ഉൾപ്പെടെയുള്ള സന്നദ്ധസംഘടനകളിലെ അംഗങ്ങൾ തുടങ്ങി ആയിരത്തോളം പേർ അണിനിരന്നു. ഗുജറാത്തി സ്‌കൂളിൽ സമാപിച്ചു. തുടർന്ന് ചുവന്ന ബലൂണുകൾ ആകാശത്തേക്ക് ഉയർത്തി. ഡോ. പി.കെ.അശോകൻ, ഡോ. നന്ദകുമാർ എന്നിവരുമായി സംവാദം നടത്തി. 80 വയസ് പിന്നിട്ടവരെയും മുൻ ജില്ലാ പ്ലീഡർ അഡ്വ. എം.കെ.എ.സലീമിനെയും ആദരിച്ചു. കെ.മൊയ്തീൻ കോയ, ആർ.ജയന്ത് കുമാർ, സി.ഇ.ചാക്കുണ്ണി, ഇമ്പിച്ചമ്മദ് തുടങ്ങിയവർ പ്രസംഗിച്ചു.