പൊൻകുന്നം : സംസ്ഥാന സർക്കാരിന്റെ പാർപ്പിട നിർമ്മാണ പദ്ധതിയായ ലൈഫിന്റെ 'ലൈഫ്' അവസാനിച്ചെന്ന് കോൺഗ്രസ് നേതാവ് കെ.മുരളീധരൻ പറഞ്ഞു. ചിറക്കടവ് കൈലാത്തുകവലയിൽ കോൺഗ്രസ് നിർമ്മിച്ചു നൽകുന്ന പ്രിയദർശിനി ഭവനത്തിന്റെ താക്കോൽദാനം നിർവഹിക്കുകയായിരുന്നു അദ്ദേഹം. ലൈഫ് ഗുണഭോക്താക്കളെ തിരഞ്ഞെടുക്കുന്നതിൽ സർക്കാർ രാഷ്ട്രീയം നോക്കുന്നു. വയനാട് ദുരന്തബാധിതർക്ക് കോൺഗ്രസ് നൂറും യൂത്ത്‌കോൺഗ്രസ് അൻപതും വീടുകൾ സൗജന്യമായി നിർമ്മിച്ചു നൽകാൻ തയ്യാറായിട്ടും സർക്കാർ സ്ഥലം കണ്ടെത്തി നൽകാൻ തയ്യാറായില്ലെന്നും അദ്ദേഹം പറഞ്ഞു. ജോസഫ് വാഴക്കൻ അദ്ധ്യക്ഷത വഹിച്ചു.