പാലാ: മരങ്ങാട്ടുപിള്ളി കെ.ആർ നാരായണൻ റോഡിലെ കുഴികൾ അടയ്ക്കാൻ അധികൃതർ തയ്യാറാകാത്തതിൽ പ്രതിഷേധിച്ച് കുഴിയടച്ച് കെ.എസ്.യുവിന്റെ വേറിട്ട സമരം. ദീർഘനാളായി കുണ്ടും കുഴിയുമായി കിടക്കുന്ന റോഡിൽ ഇടയ്ക്ക് കുഴിയടയ്ക്കൽ നടന്നെങ്കിലും അത് പൊളിഞ്ഞു പഴയ സ്ഥിതിയായി. കുഴിയിൽ വീണ് കാൽനടയാത്രക്കാർക്ക് പരിക്കും വാഹനങ്ങൾക്ക് കേടുപാടുകൾ ഉണ്ടാകുന്നതും പതിവായി.

അടുത്തിടെ കടപ്ലാമറ്റം മുതൽ മരങ്ങാട്ടുപിള്ളി വരെയുള്ള ഭാഗം റീടാർ ചെയ്തിരുന്നു. മരങ്ങാട്ടുപിള്ളി മുതൽ കൂത്താട്ടുകുളം വരെയുള്ള ഭാഗത്ത് കുഴികൾ മൂടാൻ നടപടി ഉണ്ടായില്ല.
കുഴി അടച്ച ഭാഗങ്ങളിൽ റോഡിന്റെ അലൈൻമെന്റ് തെറ്റി ഇരുചക്ര വാഹനങ്ങൾക്ക് നിയന്ത്രണം നഷ്ടപ്പെടുന്നതും പതിവാണ്. ഈ സാഹചര്യത്തിലാണ് കെ.എസ്.യു. മരങ്ങാട്ടുപിള്ളി മണ്ഡലം കമ്മിറ്റിയുടെ നേതൃത്വത്തിൽ കുറിച്ചിത്താനം ഭാഗത്തെ കുഴികൾ അടച്ച് പ്രതിഷേധിച്ചത്. സണ്ണി വടക്കേടം ഉദ്ഘാടനം ചെയ്തു. ആഷിൻ അനിൽ മേലേടം അദ്ധ്യക്ഷത വഹിച്ചു. ഷാരോൺ മാർട്ടിൻ, നവീൻ മാർട്ടിൻ, ഇമ്മാനുവൽ ലൂക്കോസ്, ജെറിൻ ജോർജ്, ആൽബിൻ ഫ്രാൻസിസ്, സ്റ്റെന്നിസ് ബെന്നി, നോബിൾ മുളങ്ങാട്ടിൽ, ജിസ് നെച്ചിമ്യാലിൽ
തുടങ്ങിയവർ പ്രസംഗിച്ചു.