കോട്ടയം : റെയിൽവേ സ്റ്റേഷനുകളുടെ വികസന പ്രവർത്തനങ്ങൾ വിലയിരുത്തുന്നതിനും ട്രെയിൻ യാത്രക്കാരുടെ പരാതികളും നിർദേശങ്ങളും സ്വീകരിക്കുന്നതിനുമായി കോട്ടയം പാർലമെന്റ് മണ്ഡലത്തിൽ ഉൾപ്പെട്ട എല്ലാ റെയിൽവേ സ്റ്റേഷനുകളിലും ജനസദസ് സംഘടിപ്പിക്കുമെന്ന് കെ.ഫ്രാൻസിസ് ജോർജ് എം.പി. അറിയിച്ചു. എം.എൽ.എമാരും മറ്റ് ജനപ്രതിനിധികളും പങ്കെടുക്കും.

റെയിൽവേ പാസഞ്ചേഴ്സ് അസോസിയേഷൻ പ്രതിനിധികൾ, പൊതുജനങ്ങൾ, രാഷ്ട്രീയ പാർട്ടി നേതാക്കൾ,​ വിവിധ സന്നദ്ധ സംഘടനകളുടെ പ്രവർത്തകർ എന്നിവരിൽ നിന്നും പരാതികളും, നിർദേശങ്ങളും സ്വീകരിക്കും.

ജനസദസിന്റെ ഉദ്ഘാടനം ഒന്നിന് രാവിലെ 10ന് ചിങ്ങവനം റെയിൽവേ സ്റ്റേഷനിൽ തിരുവഞ്ചൂർ രാധാകൃഷ്ണൻ എം.എൽ.എ നിർവഹിക്കും. ഉച്ചകഴിഞ്ഞ് 1.30ന് കാഞ്ഞിരമറ്റം റയിൽവേ സ്റ്റേഷനിൽ ജനസദസ് അനൂപ് ജേക്കബ് എം.എൽ.എ ഉദ്ഘാടനം ചെയ്യും. രണ്ടിന് നാലിന് കുറുപ്പന്തറ സ്റ്റേഷനിൽ നടക്കുന്ന ജനസദസ് അഡ്വ.മോൻസ് ജോസഫ് എം.എൽ.എ ഉദ്ഘാടനം ചെയ്യും. അഞ്ചിന് രാവിലെ 11 ന് ഏറ്റുമാനൂർ റെയിൽവേ സ്റ്റേഷനിലും ഉച്ചകഴിഞ്ഞ് 3ന് പിറവം റോഡ് റെയിൽവേ സ്റ്റേഷനിലും നടത്തും.

ജനസദസുകളിൽ നിന്നും ലഭിക്കുന്ന പരാതികളെക്കുറിച്ചും വികസന നിർദേശങ്ങളെക്കുറിച്ചും ചർച്ച ചെയ്യുന്നതിനായി ഒക്ടോബർ അവസാന വാരം കോട്ടയം റെയിൽവേ സ്റ്റേഷനിൽ നടത്തുന്ന ജനസദസിൽ എല്ലാ എം.എൽ.എ മാരും, റയിൽവേയിലെ ഉന്നത ഉദ്യോഗസ്ഥരും മറ്റ് ജനപ്രതിനിധികളും പങ്കെടുക്കുമെന്നും ഫ്രാൻസിസ് ജോർജ് പറഞ്ഞു.