പാലാ: ഏഷ്യാകപ്പ് സോഫ്റ്റ്ബാൾ ചാമ്പ്യൻഷിപ്പ് തായ്‌വാനിലേക്കുള്ള ഇന്ത്യൻ ടീമിൽ പാലാക്കാരി മനീഷ ഉൾപ്പെടെ മൂന്ന് മലയാളികൾ. തായ്‌വാന്റെ തലസ്ഥാനമായ തായ്‌പേയിൽ ഒക്ടോബർ 15 മുതൽ നടക്കുന്ന നാലാമത് ഏഷ്യാകപ്പ് സോഫ്റ്റ്ബാൾ ഏഷ്യൻ യൂണിവേഴ്‌സിറ്റി വനിതാ ചാമ്പ്യൻഷിപ്പിൽ പങ്കെടുക്കുന്ന ടീമിലാണ് പാലാ അമ്പാറ സ്വദേശിനി മനീഷ, എറണാകുളം സ്വദേശിനി അലീന ജോബി, തിരുവനന്തപുരം സ്വദേശിനി നന്ദ എസ്. പ്രവീൺ എന്നിവർ ഇടംപിടിച്ചത്. അമ്പാറ കറുകപ്പള്ളിൽ കെ.വി ജോസുകുട്ടിയുടെ മകളാണ് മനീഷ ജോസഫ്.
ചങ്ങനാശേരി അസംപ്ഷൻ കോളേജിൽ പി.ജി മനീഷ. പ്ലാശനാൽ സെന്റ് ആന്റണീസ് ഹൈസ്‌കൂളിൽ പഠിക്കുന്ന കാലത്താണ് സോഫ്റ്റ്ബാളിലേയ്ക്ക് തിരിഞ്ഞതെന്ന് മനീഷ പറഞ്ഞു. തുടർന്ന് ഭരണങ്ങാനം സെന്റ് മേരീസ് ഹയർ സെക്കന്ററി സ്‌കൂളിലും ചങ്ങനാശ്ശേരി അസംപ്ഷൻ കോളേജിലുമായി 6 വർഷത്തോളമായി പരിശീലനം നടത്തി വരുന്നു. കോച്ച് ടെന്നിസൺ പി ജോസിന്റെ കീഴിലാണ് പരിശീലനം. എം ജി യൂണിവേഴ്‌സിറ്റി ടീമിന്റെ ഭാഗമായി ഓൾ ഇന്ത്യാ മത്സരത്തിൽ മനീഷ പങ്കെടുത്തിരുന്നു. ഇപ്പോൾ ഓപ്പൺ സെലക്ഷനിലൂടെയാണ് ദേശീയ ടീമിൽ എത്തിയത്.
മനീഷയുടെ പിതാവ് ജോസുകുട്ടി ചൂണ്ടച്ചേരി സെന്റ് ജോസഫ്‌സ് എൻജിനീയറിംഗ് കോളേജിലെ ഹോസ്റ്റൽ വാർഡനാണ്. മാതാവ് ഷൈനി ജോസ് മാലിദ്വീപിൽ സ്‌കൂൾ അധ്യാപികയായി സേവനമനുഷ്ഠിക്കുന്നു. സഹോദരൻ ജസ്റ്റിൻ (യു.കെ.), സഹോദരി ഷീബ (ജർമ്മനി) എന്നിവർ വിദ്യാർത്ഥികളാണ്.