30 ഓളം ഇനം വിദേശമാവുകള്‍
56 ഇനം സ്വദേശി മാവുകള്‍
ഒറ്റപ്പാലം: വാണിയംകുളം പനയൂര്‍ കിഴക്കെ പുതുവാരിടംമന ഹരിപ്രസാദിന്റെ 15 സെന്റ് മാത്രമുള്ള കൃഷിയിടത്തില്‍ എത്തിയാല്‍ കാണാം മാവുകളുടെ വന്‍ ശേഖരം. പല വിഭാഗത്തിലായി 110 വ്യത്യസ്ത മാവിന്‍ തൈകളാണ് ഈ കൃഷിയിടത്തിലുള്ളത്. ഇതില്‍ പകുതിയിലേറെയും കായ്ച് ഫലം തരുന്നവയാണ്. ഡ്രമ്മുകളിലും ചട്ടികളിലും പോളിത്തീന്‍ കവറുകളിലുമായാണ് മാവുകള്‍ കൃഷി ചെയ്തിരിക്കുന്നത്.
എട്ട് വര്‍ഷമായി ഹരിപ്രസാദ് മാവ് കൃഷി ചെയ്യുന്നു. അറിയപ്പെടാതെ കിടക്കുന്ന മാവുകള്‍ കണ്ടെത്തി കമ്പുകള്‍ ഒട്ടിച്ച് പുതിയ തൈകളുടെ ഉത്പാദനവുമുണ്ട്. മാങ്ങകളോടുള്ള ഇഷ്ടവും കൃഷിയോടുള്ള സ്നേഹവുമാണ് മാവ് കൃഷിക്ക് പിന്നിലെ കാരണമെന്ന് ഹരിപ്രസാദ് പറഞ്ഞു. ഇതിനു പുറമെ ഡ്രാഗണ്‍ ഫ്രൂട്ട്, ശര്‍ക്കര പഴം (ഒലോ സോപ്പോ), മൂന്നു കിലോ വരെ തൂക്കം വരുന്ന മേമി സപ്പോട്ട തുടങ്ങിയവയും കൃഷിയിടത്തിലുണ്ട്. വിവിധയിനം ചാമ്പക്കകളും,അര്‍ക്ക കിരണ്‍, തായ് പിങ്ക്, ജപ്പാന്‍ പേര അലഹബാദ് സഫേദ് എന്നിങ്ങനെ 12 ഇനം പേരക്കകളും കായ്ച്ചു നില്‍ക്കുന്നുണ്ട്. ഇവയെല്ലാം കൃഷി ചെയ്യുന്നത് 15 സെന്റ് സ്ഥലത്താണ് എന്നതാണ് കൗതുകം. വലിയ ചട്ടികളിലും പ്ലാസ്റ്റിക് പാത്രത്തിലുമൊക്കെയാണ് ഇതെല്ലാം നട്ടുപിടിപ്പിച്ചിരിക്കുന്നത്. മനിശ്ശീരി ആറംകുളം അക്ലേശ്വര ക്ഷേത്ര മേല്‍ശാന്തി കൂടിയാണ് ഹരിപ്രസാദ് നമ്പൂതിരി. ഭാര്യ ജ്യോതി കൃഷ്ണയും മകള്‍ ശ്രീദേവിയും കൃഷിക്ക് പ്രോത്സാഹനം നല്‍കുന്നുണ്ട്.
മാവുകള്‍ വിദേശി മുതല്‍ തനിനാടന്‍ വരെ
മിയാസാക്കി, ലങ്കത, അമേരിക്കന്‍ റെഡ് പള്‍മര്‍, ജംബോ റെഡ്, ചോന്‍സ എന്നിങ്ങനെ 30 ഓളം ഇനം വിദേശമാവുകളും ഇവിടെയുണ്ട്. ചുവന്ന ചേലന്‍, പഞ്ചാരക്കുടവന്‍, ചന്ദ്രക്കാരന്‍, കാലാപ്പാടി, കേസര്‍, കല്ലുകട്ടി എന്നിങ്ങനെ 56 ഇനം സ്വദേശികളുമുണ്ട്. ഇതിനു പുറമെ എസ്.കെ.പി.കുഞ്ഞൂസ്, പുതുവാരിടം മാഗോ എന്നിങ്ങനെ നാട്ടില്‍ അറിയപ്പെടാത്ത കിടന്ന നല്ലയിനം മാങ്ങകളും കൃഷി ചെയ്യുന്നുണ്ട്. നാട്ടിന്‍ പുറത്ത് നിന്നുള്ള മൂവാണ്ടന്‍, നീലന്‍, പാലക്കാടന്‍ കോട്ടമാങ്ങയടക്കം 25 ഇനങ്ങളും കൃഷിയിടത്തിലുണ്ട്. ഉദ്പാദനശേഷി കൂടിയ രത്‌ന, എച്ച് 151, എച്ച് 47, നീലി ഷാന്‍, മേലുദ്ധീന്‍ എന്നിങ്ങനെ 25 ഇനങ്ങളാണുള്ളത്.