തൃശൂർ: ബസ് മോഷണം പോയതായി പരാതി. തൃശൂർ കുന്നംകുളം പുതിയ ബസ് സ്റ്റാൻഡിൽ നിന്നാണ് ബസ് മോഷണം പോയിരിക്കുന്നത്. കുന്നംകുളം - ഗുരുവായൂർ റൂട്ടിൽ സർവീസ് നടത്തുന്ന ഷോണി ബസാണ് കാണാതായിരിക്കുന്നത്.

ഇന്ന് പുലർച്ചെ 4.10 ഓടെയാണ് മോഷണം നടന്നത്. 4.13ന് ബസ് കുന്നംകുളം ബസ് സ്റ്റാൻഡിന് മുൻപിലെ സിസിടിവി ക്യാമറയിലും 4.19ന് ചാട്ടുകുളത്തെ സിസിടിവി ക്യാമറയിലും മോഷ്ടാവ് ബസ് ഓടിച്ച് പോകുന്നതിന്റെ ദൃശ്യങ്ങൾ പതിഞ്ഞിട്ടുണ്ട്. ഡ്രെെവർ ബസ് എടുക്കാൻ എത്തിയപ്പോഴാണ് മോഷണവിവരം അറിയുന്നത്. സംഭവത്തിൽ പൊലീസ് അന്വേഷണം ആരംഭിച്ചു.