തൃശൂർ: കുന്നംകുളം ബസ് സ്റ്റാൻഡിൽ നിന്ന് മോഷണം പോയ ബസ് കണ്ടെത്തി. ബസിന്റെ പഴയ ഡ്രെെവർ ഷംനാദ് ആണ് ബസ് കടത്തിക്കൊണ്ടുപോയതെന്നാണ് വിവരം. തുടർന്ന് ഇയാൾ ബസ് ഗുരുവായൂർ മേൽപ്പാലത്തിന് കീഴിൽ ഉപേക്ഷിക്കുകയായിരുന്നു. എന്നാൽ മറ്റ് യാത്രാ മാർഗങ്ങൾ ഇല്ലാത്തതിനാലാണ് ബസ് എടുത്തുകൊണ്ട് പോയതെന്ന് ഡ്രെെവർ പൊലീസിന് മൊഴി നൽകി.

കുന്നംകുളം - ഗുരുവായൂർ റൂട്ടിൽ സർവീസ് നടത്തുന്ന ഷോണി ബസാണ് ഇന്ന് രാവിലെ മോഷണം പോയത്. ഇന്ന് പുലർച്ചെ 4.10 ഓടെയാണ് മോഷണം നടന്നത്. 4.13ന് ബസ് കുന്നംകുളം ബസ് സ്റ്റാൻഡിന് മുൻപിലെ സിസിടിവി ക്യാമറയിലും 4.19ന് ചാട്ടുകുളത്തെ സിസിടിവി ക്യാമറയിലും മോഷ്ടാവ് ബസ് ഓടിച്ച് പോകുന്നതിന്റെ ദൃശ്യങ്ങൾ പതിഞ്ഞിട്ടുണ്ട്. ഡ്രെെവർ ബസ് എടുക്കാൻ എത്തിയപ്പോഴാണ് മോഷണവിവരം അറിയുന്നത്. സംഭവത്തിൽ പൊലീസ് കൂടുതൽ അന്വേഷണം നടത്തിവരികയാണ്.