കൊല്ലം: മൈനാഗപ്പള്ളി ആനൂർക്കാവിൽ സ്‌കൂട്ടർ യാത്രികരെ ഇടിച്ചുവീഴ്‌ത്തുകയും യാത്രക്കാരിയുടെ ശരീരത്തിലൂടെ കാർ കയറ്റിയിറക്കി പോകുകയും ചെയ്‌ത സംഭവത്തിൽ വാഹനം ഓടിച്ചയാൾ പിടിയിൽ. കരുനാഗപ്പള്ളി വെളുത്തമണൽ സ്വദേശി അജ്‌മൽ ആണ് പൊലീസിന്റെ പിടിയിലായത്. ശാസ്‌താംകോട്ട പതാരത്തുനിന്നാണ് ഇയാളെ കണ്ടെത്തിയത്. തിരുവോണനാളിൽ വൈകുന്നേരം 5.45നായിരുന്നു അപകടം. സ്‌കൂട്ടർ യാത്രക്കാരി മൈനാഗപ്പള്ളി സ്വദേശിനി കുഞ്ഞുമോൾ (45) ആണ് മരിച്ചത്.സ്‌കൂട്ടർ ഓടിച്ചിരുന്ന ഫൗസിയയ്‌ക്കും പരിക്കേറ്റു.

അപകടം നടന്നയുടൻ തന്നെ കാറും കാറിലുണ്ടായിരുന്ന യുവ വനിതാ ഡോക്‌ടറെയും പൊലീസ് കസ്‌റ്റഡിയിൽ എടുത്തിരുന്നു. സ്‌കൂട്ടറിന് പിന്നിൽ അജ്‌മൽ കാറിടിച്ചപ്പോൾ തന്നെ നാട്ടുകാർ വാഹനം നിർത്താൻ ആവശ്യപ്പെട്ടിരുന്നു. എന്നാൽ ഇത് വകവയ്‌‌ക്കാതെ ഇയാൾ കുഞ്ഞുമോളുടെ ശരീരത്തിലൂടെ വാഹനം കയറ്റിയിറക്കി സ്ഥലത്ത് നിന്നും രക്ഷപ്പെടാൻ ശ്രമിക്കുകയായിരുന്നു. കുഞ്ഞുമോളെ ഉടൻ അടുത്തുള്ള സ്വകാര്യ ആശുപത്രിയിൽ എത്തിച്ചെങ്കിലും രാത്രി 9.45ഓടെ മരിച്ചു. കഴുത്തിലൂടെയാണ് അജ്‌മൽ കാർ കയറ്റിയിറക്കിയത് എന്നാണ് വിവരം.

പ്രതി അജ്‌മൽ ലഹരിമരുന്ന് കേസിലെ പ്രതിയാണോ എന്നതടക്കം പൊലീസ് പരിശോധിക്കുകയാണ്. യുവ വനിതാ ഡോക്‌ടർ മദ്യലഹരിയിലാണോ എന്ന കാര്യവും അന്വേഷിക്കുന്നുണ്ട്. രക്ഷപ്പെടാൻ ശ്രമിക്കുന്നതിനിടെ അജ്‌മൽ ഒരു ബൈക്കിലും മതിലിലും കാർ ഇടിച്ചുകയറ്റിയിരുന്നു.