മലയാളികളുടെ പ്രിയപ്പെട്ട പ്രഭാത ഭക്ഷണ വിഭവങ്ങളാണ് ദോശയും ഇഡ്ഡലിയും അപ്പവും. ആഴ്‌ചയിൽ ഒരിക്കലെങ്കിലും ഇവ തയ്യാറാക്കാത്ത മലയാളി വീടുകൾ വിരളമായിരിക്കും. മൂന്നോ നാലോ ദിവസത്തേയ്ക്ക് ആവശ്യമായ മാവ് ഒരുമിച്ച് അരച്ചുവച്ച് ഫ്രിഡ്‌ജിൽ സൂക്ഷിക്കുകയാണ് ഇന്ന് കൂടുതൽപ്പേരും ചെയ്യുന്നത്.
ദിവസേന ജോലിക്ക് പോകുന്നവരുള്ള വീടാണെങ്കിൽ എല്ലാദിവസും മാവ് തയ്യാറാക്കുന്നത് ബുദ്ധിമുട്ടായിരിക്കും. അതിനാൽ തന്നെ ഒരാഴ്‌ചത്തേയ്ക്കുവരെ ഒരുമിച്ച് അരച്ചുവച്ചതിനുശേഷം കുറച്ച് കുറച്ചായി മാവ് എടുത്ത് ദോശയും ഇഡ്ഡലിയും മാറിമാറി ഉണ്ടാക്കുകയായിരിക്കും മിക്കവരും ചെയ്യുന്നത്. അതുപോലെതന്നെ അപ്പത്തിനുള്ള മാവ് മൂന്നോ നാലോ ദിവസത്തേയ്ക്ക് മിക്കവരും അരച്ചുവയ്ക്കാറുണ്ട്. എന്നാൽ ഇത്തരത്തിൽ കൂടുതലായി അരച്ചുവയ്ക്കുമ്പോൾ നേരിടുന്ന പ്രധാന പ്രശ്‌നമാണ് മാവ് പുളിച്ചുപോകുന്നത്. ഫ്രിഡ്‌ജിൽ വച്ചിരുന്നാലും രണ്ട് ദിവസം കഴിയുമ്പോൾ തന്നെ മാവ് പുളിക്കാറുണ്ട്. എന്നാൽ ഈ പ്രശ്‌നത്തിന് സിമ്പിളായൊരു പരിഹാരമുണ്ട്.
മിക്കവാറും എല്ലായിടത്തും കാണുന്ന ഒരു ഇല മാവ് അമിതമായി പുളിച്ച് ഭക്ഷണയോഗ്യമല്ലാതാക്കുന്നതിൽ നിന്ന് രക്ഷിക്കും. വെറ്റിലയാണ് ഈ ഇല. മുറുക്കുന്നവരുള്ള വീടാണെങ്കിൽ അവിടെ സാധാരണയായി വെറ്റില ഉണ്ടായിരിക്കും. ചെറിയ സ്റ്റേഷനറി കടകളിലും വെറ്റില ലഭ്യമായിരിക്കും. വെറ്റില നന്നായി കഴുകിയെടുത്തതിന് ശേഷം അരച്ചുവച്ചിരിക്കുന്ന മാവിന് മുകളിലായി വയ്ക്കാം. ഇനിയിത് അടച്ചുവച്ചതിനുശേഷം ഫ്രിഡ്‌ജിൽ വച്ചാൽ എത്രദിവസം വേണമെങ്കിലും മാവ് പുളിക്കാതെ സൂക്ഷിക്കാം.