ചെന്നൈ: തമിഴ് ചലച്ചിത്ര സംവിധായകൻ മോഹൻ ജി അറസ്റ്റിൽ. പഴനി ക്ഷേത്രത്തിലെ പ്രസാദമായ 'പഞ്ചാമൃതം" സംബന്ധിച്ച് അപകീർത്തികരമായ പരാമർശം നടത്തിയെന്നാരോപിച്ചാണ് ഇന്നലെ ട്രിച്ചി ജില്ലാ സൈബർ ക്രൈം പൊലീസ് അറസ്റ്റ് ചെയ്തത്. തിരുമല തിരുപ്പതിയിൽ ഭക്തർക്ക് പ്രസാദമായി നൽകുന്ന ലഡുകളിൽ മൃഗ കൊഴുപ്പ് കലർന്നിട്ടുണ്ടെന്ന വാർത്ത വന്നതിന് പിന്നാലെയാണ് മോഹൻ തമിഴ്നാട്ടിലെ പ്രധാന ക്ഷേത്രമായ പഴനിയിലെ പ്രസാദമായ 'പഞ്ചാമൃതത്തിൽ' ഗർഭനിരോധന ഗുളികകൾ കലർത്തിയെന്ന അഭ്യൂഹങ്ങൾ താൻ കേട്ടിട്ടുണ്ടെന്ന് ആരോപിച്ചത്.

ഇതിനെതിരെ സോഷ്യൽ മീഡിയയിൽ വ്യാപക പരാതി ഉയർന്നിരുന്നു. തുടർന്ന് വിവിധ സംഘടനകൾ അടക്കം ഇയാൾക്കെതിരെ രംഗത്ത് വന്നിരുന്നു. ഇത്തരം ഒരു സംഘടന ട്രിച്ചി പൊലീസിന് നൽകിയ പരാതിയിലാണ് ഇപ്പോൾ അറസ്റ്റ് എന്നാണ് വിവരം.

അതേസമയം, തമിഴ് ചലച്ചിത്ര സംവിധായകനെ മുൻകൂർ അറിയിപ്പ് കൂടാതെ അറസ്റ്റ് ചെയ്തതായി ചെന്നൈയിലെ ബി.ജെ.പി അദ്ധ്യക്ഷൻ അശ്വത്ഥാമൻ അല്ലിമുത്തു എക്‌സിൽ അവകാശപ്പെട്ടു.