ഇന്ന് മുതൽ ഭൂമിക്ക് രണ്ട് ചന്ദ്രന്മാർ. മിനി മൂൺ എന്ന് വിളിക്കുന്ന 2024 പിടി 5 എന്ന ഛിന്നഗ്രഹം ഇന്നുമുതൽ ഭൂമിയെ ഭ്രമണം ചെയ്യും. ഏകദേശം 10 മീറ്റർ (33അടി) വ്യാസമുള്ള ഈ ഛിന്നഗ്രഹം സെപ്തംബർ 29 മുതൽ നവംബർ 25 വരെ നമ്മുടെ ഭൂമിയെ ചുറ്റും. ഭൂമിക്ക് യാതൊരു അപകടവും സൃഷ്ടിക്കാതെയായിരിക്കും ഇതിന്റെ യാത്രയെന്നാണ് ഗവേഷകർ പറയുന്നത്.

ഈ മിനി മൂൺ നഗ്നനേത്രങ്ങൾ കൊണ്ട് കാണാൻ കഴിയില്ല. ബെെനോക്കുലറുകളോ ദൂരദർശിനികളോ ഉപയോഗിച്ചാൽ പോലും കാണാൻ കഴിയില്ലെന്നാണ് വിവരം. മികച്ച നിലവാരമുള്ള ടെലിസ്കോപ്പുകൾ ഉപയോഗിച്ച് മാത്രമേ ഇവ കാണാൻ സാധിക്കുകയുള്ളു.

ചന്ദ്രനെക്കാൾ വളരെ ചെറുതായ ഈ ഛിന്നഗ്രഹം 'അർജുന' എന്ന ഛിന്നഗ്രഹ ബെൽറ്റിലെ അംഗമാണ്. ഏകദേശം 3,500 കിലോമീറ്റർ/ മണിക്കൂറിർ വേഗത്തിലാണ് ഇത് സഞ്ചരിക്കുന്നത്. ഇതിനെ ഭൂമിയുടെ ഗുരുത്വാകർഷണം ഭ്രമണപഥത്തിലേക്ക് പിടിച്ചെടുക്കുന്നതോടെയാണ് ഭൂമിയെ ചുറ്റിത്തിരിയാൻ മിനി മൂൺ സജ്ജമാകുന്നത്. ശേഷം നവംബർ 25ഓടെ അതിന്റെ യഥാർത്ഥ ഭ്രമണപഥമായ അർജുന ഛിന്നഗ്രഹ ബെൽറ്റിലേക്ക് മടങ്ങിപ്പോകും.

ഭൂമിയുടേതിന് സമാനമായ ഭ്രമണപഥമുള്ള ബഹിരാകാശ വസ്തുക്കൾ കൊണ്ട് നിർമിതമായ ദ്വിതീയ ഛിന്നഗ്രഹ വലയത്തെയാണ് അർജുന എന്ന് വിളിക്കുന്നത്. 2024 ഓഗസ്റ്റ് ഏഴിന് ദക്ഷിണാഫ്രിക്കയിലെ ആസ്റ്ററോയ്ഡ് ടെറസ്ട്രിയൽ-ഇംപാക്റ്റ് ലാസ്റ്റ് അലേർട്ട് സിസ്റ്റം ( അറ്റ്ലസ് -ATLAS) ആണ് ഈ ഛിന്നഗ്രഹത്തെ കണ്ടെത്തിയത്.