സ്വര്‍ണ വായ്പകള്‍ 10 ലക്ഷം കോടി രൂപ കവിഞ്ഞു
കൊച്ചി: റെക്കാഡുകള്‍ പുതുക്കി വില കുതിക്കുന്നതിനിടെ രാജ്യത്തെ സ്വര്‍ണ പണയ വിപണി മികച്ച മുന്നേറ്റം നടത്തുന്നു. വാണിജ്യ ബാങ്കുകള്‍ക്കൊപ്പം ബാങ്കിംഗ് ഇതര ധനകാര്യ സ്ഥാപനങ്ങളും സ്വര്‍ണ വായ്പ ബിസിനസ് നേടാന്‍ പുതിയ തന്തരങ്ങളുമായി വിപണിയില്‍ സജീവമായി. നടപ്പു സാമ്പത്തിക വര്‍ഷം ബാങ്കുകളുടെയും ഇതര ധനകാര്യ സ്ഥാപനങ്ങളുടെയും മൊത്തം സ്വര്‍ണ വായ്പകള്‍ പത്ത് ലക്ഷം കോടി രൂപ കവിയുമെന്ന് പ്രമുഖ സാമ്പത്തിക ഗവേഷണ ഏജന്‍സിയായ ഐ.സി.ആര്‍.എയുടെ റിപ്പോര്‍ട്ടില്‍ പറയുന്നു. 2027ല്‍ മൊത്തം സ്വര്‍ണ വായ്പ പതിനഞ്ച് ലക്ഷം കോടി രൂപ കവിയുമെന്നും റിപ്പോര്‍ട്ടില്‍ പറയുന്നു.
ഈടില്ലാത്ത വായ്പകള്‍ക്ക് റിസര്‍വ് ബാങ്ക് കടുത്ത നിയന്ത്രണങ്ങള്‍ ഏര്‍പ്പെടുത്തിയതോടെയാണ് പുതുതലമുറ സ്വകാര്യ ബാങ്കുകള്‍ ഉള്‍പ്പെടെ സ്വര്‍ണ പണയത്തില്‍ ശ്രദ്ധ കേന്ദ്രീകരിക്കുന്നത്. അതിവേഗം വായ്പ നടപടികള്‍ പൂര്‍ത്തിയാക്കി മികച്ച വരുമാനം നേടാനാകുന്നതും ഈ രംഗത്ത് ബാങ്കുകളുടെ താത്പര്യം വര്‍ദ്ധിപ്പിക്കുന്നു. ഒരു വര്‍ഷത്തിനിടെ സ്വര്‍ണ വിലയില്‍ 25 ശതമാനത്തിനടുത്ത് വര്‍ദ്ധനയാണുണ്ടായത്. ഇതോടെ സ്വര്‍ണ പണയ വായ്പയിലൂടെ 20 ശതമാനം തുക അധികമായി ലഭിക്കുന്നതിനാല്‍ ഉപഭോക്താക്കളും വലിയ ആവേശമാണ് പ്രകടിപ്പിക്കുന്നത്.
പൊതുമേഖല ബാങ്കുകള്‍ക്ക് മേധാവിത്തം
സ്വര്‍ണ പണയ വിപണിയില്‍ നാല് വര്‍ഷമായി പൊതുമേഖല ബാങ്കുകള്‍ വിപണി വിഹിതം തുടര്‍ച്ചയായി മെച്ചപ്പെടുത്തുകയാണ്. 2020 മുതല്‍ പൊതുമേഖല ബാങ്കുകള്‍ സ്വര്‍ണ വായ്പാ വിതരണത്തില്‍ പ്രതിവര്‍ഷം 34 ശതമാനം വളര്‍ച്ച നേടുന്നു. ഇതോടെ ബാങ്കിംഗ് ഇതര ധനകാര്യ സ്ഥാപനങ്ങളുടെ വിപണി വിഹിതം കുറഞ്ഞു. കഴിഞ്ഞ മാര്‍ച്ചില്‍ സ്വര്‍ണ പണയ വിപണിയില്‍ പൊതുമേഖല ബാങ്കുകളുടെ വിഹിതം 63 ശതമാനമായി ഉയര്‍ന്നു. സ്വര്‍ണം ഈടായി സ്വീകരിച്ച് കാര്‍ഷിക വായ്പകള്‍ സബ്‌സിഡിയോടെ വിതരണം ചെയ്യുന്നതാണ് ബാങ്കുകളുടെ വിഹിതം കൂടാന്‍ ഇടയാക്കിയത്.
സ്വര്‍ണ വിലയിലെ കയറ്റം
വര്‍ഷം പവന്‍ വില(രൂപയില്‍)
1925 മാര്‍ച്ച് 13.75
1950 മാര്‍ച്ച് 72.75
1970 മാര്‍ച്ച് 396
1980 മാര്‍ച്ച് 975
1990 മാര്‍ച്ച് 2,493
1995 മാര്‍ച്ച് 3,432
2000 മാര്‍ച്ച് 3,212
2005 മാര്‍ച്ച് 4,550
2010 മാര്‍ച്ച് 12,280
2014 മാര്‍ച്ച് 21,480
2017 മാര്‍ച്ച് 21,800
2020 മാര്‍ച്ച് 32,000
2021 മാര്‍ച്ച് 32,880
2022 മാര്‍ച്ച് 38,120
2023 മാര്‍ച്ച് 44,000
2024 മാര്‍ച്ച് 50,200
2024 സെപ്തംബര്‍ 27 56,800