കോന്നി: ഹാരിസൺ മലയാളം ലിമിറ്റഡിന്റെ കുമ്പഴ എസ്റ്റേറ്റിലെ വട്ടത്തറ ഡിവിഷനിൽ എസ്റ്റേറ്റ് മാനേജരുടെ ക്വാർട്ടേഴ്സിൽ നിന്നും കോടയും വാറ്റുപകരണങ്ങളും എക്സൈസ് സംഘം കണ്ടെടുത്തു. എസ്റ്റേറ്റിലെ സി.എൽ ഫാക്ടറി മാനേജരായ മലയാലപ്പുഴ, പൊതിപ്പാട്, കൊച്ചുമാണിക്കുന്നേൽ, സജി കെ.എസ്, എസ്റ്റേറ്റിലെ തൊഴിലാളികളായ മലയാലപ്പുഴ, കടുവാക്കുഴി പൊന്നമ്പിൽ, രാജേഷ്, മലയാലപ്പുഴ, പുളിമൂട്ടിൽ, ബിജു എന്നിവരുടെ പേരിൽ കേസെടുത്തു. കാർട്ടേഴ്സിൽ നിന്നും ബക്കറ്റിൽ സൂക്ഷിച്ചിരുന്ന 5 ലിറ്റർ കോടയും ചാരായത്തിന്റെ കുപ്പികളും വാറ്റുപകരണങ്ങളും കണ്ടെടുത്തു. ഇവിടെ നിന്ന് 10 മീറ്റർ മാറി പറമ്പിൽ നിന്നും 198 ലിറ്റർ കോടയും എട്ടു ലിറ്റർ ചാരായവും വാറ്റ് ഉപകരണങ്ങളും അലൂമിനിയം കലവും ചരുവവും ഗ്യാസ് സിലിണ്ടറും കണ്ടെടുത്തു. മാനേജരെ അറസ്റ്റ് ചെയ്തു.