പ്രമാടം : പ്രമാടം ഗ്രാമപഞ്ചായത്തിലെ പൂങ്കാവ് ചന്തയിൽ ഷോപ്പിംഗ് കോംപ്ളക്സ് വരുന്നു. മൂന്ന് കോടി രൂപ ചെലവിലാണ് നിർമ്മാണം. കഴിഞ്ഞ സംസ്ഥാന ബഡ്ജറ്റിൽ ഇതിനുള്ള തുക വകയിരുത്തിയിരുന്നു. അത്യാധുനിക രീതിയിൽ പണിയുന്ന ബഹുനില കെട്ടിടത്തിന്റെ നിർമ്മാണവുമായി ബന്ധപ്പെട്ടുള്ള പ്രാഥമിക നടപടികൾ തുടങ്ങി. ജില്ലാ ആസ്ഥാനത്തോട് ചേർന്ന് കിടക്കുന്ന പഞ്ചായത്താണ് പ്രമാടം. ഷോപ്പിംഗ് കോംപ്ളക്സ് വരുന്നതോടെ പൂങ്കാവിന്റെ മുഖച്ഛായ തന്നെ മാറും.

പ്രമാടം ഗ്രാമപഞ്ചായത്തിന്റെ സിരാകേന്ദ്രമാണ് പൂങ്കാവ്. തിരക്കേറിയ കോന്നി - ചന്ദനപ്പള്ളി റോഡും പൂങ്കാവ് - പത്തനംതിട്ട റോഡും സംഗമിക്കുന്ന ജംഗ്ഷനാണിത്. പഞ്ചായത്തിലെ പ്രധാന മാർക്കറ്റും ഇവിടെയാണ് . വില്ലേജ് ഓഫീസ്, പോസ്റ്റ് ഓഫീസ്, അക്ഷയ കേന്ദ്രം, ബാങ്കുകൾ തുടങ്ങി നിരവധി സർക്കാർ- അർദ്ധ സർക്കാർ സ്ഥാപനങ്ങളും ഇവിടെ പ്രവർത്തിക്കുന്നുണ്ട്. പഞ്ചായത്തിലെ പ്രധാന രാഷ്ട്രീയ - സാംസ്കാരിക -സാമുദായിക - പൊതു പരിപാടികൾ ഇവിടെയാണ് നടക്കുന്നത്.

പദ്ധതി ഇങ്ങനെ

മാർക്കറ്റിനുള്ളിൽ "എൽ" ആകൃതിയിൽ ബഹുനില ഷോപ്പിംഗ് കോംപ്ളക്സാണ് നിർമ്മിക്കുന്നത്. നിലവിലുള്ള നിർമ്മാണങ്ങൾ ഭാഗികമായി പൊളിക്കേണ്ടി വരും. ഫിഷ് സ്റ്റാൾ, മീറ്റ് സ്റ്റാൾ, പച്ചക്കറി സ്റ്റാളുകൾ, വിവിധ വ്യാപാര സ്ഥാപനങ്ങൾ, കോൺഫറൻസ് ഹാൾ, മിനി ഓഡിറ്റോറിയം തുടങ്ങിയവ ഉണ്ടാകും.