പത്തനംതിട്ട : പത്തനംതിട്ടയിൽ നിന്ന് മലയാലപ്പുഴ വഴി മലയോര ഗ്രാമമായ തലച്ചിറയിലേക്കുള്ള കെ.എസ്.ആർ.ടി​.സി​ സർവീസുകൾ മുന്നറിയിപ്പില്ലാതെ റദ്ദാക്കുന്നു. നിത്യേന വൈകിട്ട് 5.10, 5.30, 6.05, 6.45 എന്നീ സമയങ്ങളിലാണ് പത്തനംതിട്ട കെ.എസ്.ആർ.ടി.സി ഡി​പ്പോയി​ൽ നിന്ന് തലച്ചിറയിലേക്ക് സർവീസുള്ളത്. മിക്കദിവസങ്ങളിലും 5.30നും 6.05നും പുറപ്പെടുന്ന സർവീസുകൾ റദ്ദുചെയ്യും. ബസി​ൽ കയറാൻ എത്തുമ്പോൾ ആയി​രി​ക്കും സർവീസ് റദ്ദാക്കി​യ കാര്യം യാത്രക്കാർ അറി​യുക. ബസ് ഇല്ലെങ്കി​ൽ അമി​ത യാത്രാക്കൂലി​ നൽകി​ സമാന്തര സർവീസുകളെ ആശ്രയി​ക്കേണ്ടി​വരും.

വടശ്ശേരിക്കര ഭാഗത്തുകൂടി പോകുന്ന ബസിൽ കയറി 20രൂപ ടിക്കറ്റ് എടുത്ത് ചെങ്ങറമുക്കിലിറങ്ങി ഇവിടെ നിന്ന് ഓട്ടോറിക്ഷയിൽ 60 രൂപ നൽകിയാൽ തലച്ചിറയിലെത്താം. ഇങ്ങനെ കൂടുതൽ പണം നൽകി യാത്രചെയ്യാൻ നിവർത്തിയില്ലാത്തവർ അവസാന ബസ് പുറപ്പെടുന്നതുവരെ സ്റ്റാൻഡി​ൽ കാത്തിരിക്കേണ്ടി​വരും.

കെ.എസ്.ആർ.ടി.സിയുടെ നിരുത്തരവാദപരമായ സമീപനം പതി​വ് യാത്രക്കാർക്കാണ് ഏറെ ബുദ്ധിമുട്ട് സൃഷ്ടിക്കുന്നത്. വൈകുന്നേരങ്ങളിലെ സർവീസ് മുടങ്ങുന്നതുമൂലം വിദ്യാർത്ഥികളും സ്ത്രീകളും ഉൾപ്പടെയുള്ള യാത്രക്കാർ വീടുകളിലെത്തുമ്പോൾ രാത്രിയാകും. ഇത് സാമ്പത്തിക നഷ്ടം മാത്രമല്ല സുരക്ഷിതമായ യാത്രയ്ക്കും തടസമാണ്.

ധന്യ, യാത്രക്കാരി.