ചിറക്കര: ജില്ലാ പഞ്ചായത്തിന്റെ ഉടമസ്ഥതയിലുള്ള കൊച്ചാലുംമൂട്- ഒഴുകുപാറ റോഡ് പൊട്ടിപ്പൊളിഞ്ഞിട്ട് 18 വർഷം. സ്‌കൂളുകളും കോളേജുകളുമുൾപ്പടെയുള്ള, തിരക്കേറിയ ഈ റൂട്ട് വാഹന സാന്ദ്രതയേറിയതാണ്. കാൽനട യാത്രികരും ഏറെ ആശ്രയിക്കുന്ന റോഡാണിത്.

ടാറിംഗ് പൊട്ടിപ്പൊളിഞ്ഞ റോഡിൽ മഴ കടുത്തതോടെ വലി​യ ഗർത്തങ്ങൾ രൂപപ്പെട്ടു. മഴവെള്ളക്കെട്ടിൽ കുഴി ഏതെന്ന് അറിയാതെ സൈക്കിൾ ഉൾപ്പടെയുള്ള ടൂ വീലർ യാത്രി​കർ അപകടത്തിൽപ്പെടുന്നുണ്ട്. വീണു പരി​ക്കേറ്റ പെൺകുട്ടികളും അനവധി​.

.................................

ടിപ്പർ ലോറികൾ പായുന്ന റൂട്ടാണി​ത്. വലിയ വാഹനങ്ങൾക്ക് മുന്നിൽ നി​ന്ന് രക്ഷപ്പെടാൻ ടൂ വീലറുകൾ ഒതുക്കുമ്പോൾ നിലവിട്ട് വീണ നിരവധി സംഭവങ്ങളുണ്ട്. ഇതുവഴി​ സ്വകാര്യ ബസുകളും സർവീസ് നടത്തുന്നു

വിനോദ് പാണിയിൽ

സേവാദൾ ചിറക്കര മണ്ഡലം ചെയർമാൻ

....................................

2021- 22 വർഷം മെയിന്റനൻസ് ഗ്രാന്റായി 20 ലക്ഷം അനുവദിച്ചിരുന്നു. കരാറുകാർ പ്രവൃത്തി ഏറ്റെടുക്കാൻ തയ്യാറാകാതിരുന്നത് പ്രതിസന്ധി സൃഷ്‌ടിച്ചു. റീ ടെണ്ടർ ചെയ്‌തും ക്വട്ടേഷൻ വഴിയും കരാറുകാരനെ കണ്ടെത്താനുള്ള ശ്രമത്തിനാെടുവിൽ ആ വർഷം മാർച്ച് 31 ന് കരാറുകാരനെ കൊണ്ട് എഗ്രിമെന്റ് തയ്യാറാക്കിയെങ്കിലും ഒടുവിൽ പിന്മാറി. തുക കുറേനാൾ സ്‌പിൽ ഓവറായി. നിലവിൽ 2024- 25 വർഷത്തേക്ക് ജില്ലാ പഞ്ചായത്തിന്റെ തനത് ഫണ്ടായ 10 ലക്ഷം അനുവദിച്ചു. ഡി.പി.സി അനുമതിയും ലഭിച്ചു. അധിക ഫണ്ട് കണ്ടെത്തി നവീകരണം പൂർത്തിയാക്കും

ശ്രീജ ഹരീഷ്, ജില്ലാ പഞ്ചായത്ത് വൈസ് പ്രസിഡന്റ്