.

ചാത്തന്നൂർ: ഇലകമൺ ഗ്രാമ പഞ്ചായത്തിലെ ഹരിഹരപുരത്ത് ഏക മകന്റെ പീഡനം സഹി​ച്ച് കഴി​യുകയായി​രുന്ന ട്രീസയെ (72) വേളമാനൂർ ഗാന്ധിഭവൻ സ്‌​നേഹാശ്രമം ഏറ്റെടുത്തു. മകൻ മർദ്ദി​ച്ച് വീട്ടിൽ നിന്ന് ഇറക്കിവിട്ട ഇവർ പല വീടുകളിലായി കഴിയുകയായിരുന്നു. അയിരൂർ പൊലീസ് അധികൃതർ ആവശ്യപ്പെട്ടിട്ടും അമ്മയെ സംരക്ഷിക്കാൻ മകൻ തയ്യാറായില്ല. ഇലകമൺ ഗ്രാമപഞ്ചായത്ത് അംഗം വി.ബിനുവിന്റെയും അയിരൂർ പൊലീസ് ഇൻസ്‌​പെക്ടറുടെയും അപേക്ഷപ്രകാരമാണു വേളമാനൂർ ഗാന്ധിഭവൻ സ്‌​നേഹാശ്രമം ട്രീസയുടെ സംരക്ഷണം ഏ​റ്റെടുത്തത്. സ്‌​നേഹാശ്രമം ചെയർമാൻ ബി.പ്രേമാനന്ദ് ട്രീസയെ പൊന്നാട ചാർത്തി സ്വീകരിച്ചു. ഡയറക്ടർ പത്മാലയം ആർ.രാധാകൃഷ്ണൻ, വൈസ് ചെയർമാൻ തിരുവോണം രാമചന്ദ്രൻ പിള്ള, സെക്രട്ടറി പി.എം.രാധാകൃഷ്ണൻ, കെ.എം.രാജേന്ദ്രകുമാർ, ഡോ.രവിരാജൻ, ജി. രാമചന്ദ്രൻപിള്ള, ബി. സുനിൽകുമാർ, ആലപ്പാട്ട് ശശിധരൻ, ട്രീസയുടെ ബന്ധു നാടക കലാകാരി ഡെയ്‌​സി എന്നിവർ പങ്കെടുത്തു.