കച്ചവടം ഉഷാറെന്ന് വ്യാപാരികൾ

കൊല്ലം: ഓണസദ്യ വി​ളമ്പുന്ന ഇലയുടെ ഒരറ്റത്ത് ഉപ്പേരി​യി​ല്ലെങ്കി​ൽ സദ്യ പൂർണമാവി​ല്ലെന്ന വി​ശ്വാസക്കാരാണ് മലയാളി​കൾ. പൊന്നോണത്തി​ലേക്ക് കൂടുതൽ അടുക്കുന്തോറും ഉപ്പേരി വിപണി സജീവമാകുകയാണ്.

വറുത്തുകോരി കവറുകളിൽ നിറയ്ക്കേണ്ട താമസം മാത്രം, നി​മി​ഷങ്ങൾക്കുള്ളി​ൽ വി​റ്റുപോകും. ഓണം മുന്നിൽക്കണ്ട് കഴിഞ്ഞമാസം തന്നെ ഉപ്പേരി വിപണിയി​ൽ ഒരുക്കങ്ങൾ തുടങ്ങി​യി​രുന്നു. മൊത്ത വിപണിയോടൊപ്പം വാഹനങ്ങളിലും മറ്രും എത്തി​ച്ചുള്ള ചില്ലറ വില്പനയും തുടങ്ങിക്കഴിഞ്ഞു. പച്ചക്കായുടെ ചിപ്സിനേക്കാൾ കൂടുതൽ ഡിമാൻഡ് പഴുത്ത ഏത്തയ്ക്കയുടെ ചിപ്സിനാണ്. കൂടാതെ കപ്പ, ഉരുളക്കിഴങ്ങ്, കാച്ചിൽ, ചേന എന്നിവയുടെ ചിപ്സുകൾക്കും ആവശ്യക്കാർ ഉണ്ടെന്ന് വ്യാപാരികൾ പറയുന്നു. ഓണസദ്യയിൽ ഉപയോഗിക്കാനും ബന്ധുവീടുകളിൽ നൽകാനുമാണ് ഇത്തരം ഉപ്പേരികൾ ഉപയോഗിക്കുന്നത്. തിരുവോണം അടുക്കുന്നതോടെ കച്ചവടം ഇനിയും ഉഷാറാകുമെന്നാണ് കച്ചവടക്കാർ പറയുന്നത്.

തി​ളച്ചുമറി​ഞ്ഞ് വി​ല

ഏത്തയ്ക്കയുടെയും വെളിച്ചെണ്ണയുടെയും വിലയി​ലെ മാറ്റം ഉപ്പേരി വിലയെയും ബാധിച്ചിട്ടുണ്ട്. ഒരു കിലോ ചിപ്സിന് 500 രൂപയും ശർക്കരവരട്ടിക്ക് 400 രൂപയുമാണ്. കടകൾക്കും സ്ഥലത്തിനും അനുസരിച്ച് വിലയിൽ മാറ്റമുണ്ടാകാം. രണ്ടുമാസം മുൻപ് വരെ കിലോയ്ക്ക് 250 രൂപയായി​രുന്നു ചി​പ്സി​ന്. തമിഴ്നാട്ടിൽ നിന്ന് എത്തി​ക്കുന്ന ഏത്തയ്ക്കയാണ് ഉപ്പേരി​ നി​ർമ്മാണത്തി​ന് പ്രധാനമായും ഉപയോഗി​ക്കുന്നത്. നാടൻ ഏത്തയ്ക്കയുടെ ഉപ്പേരി​ക്ക് വി​ല കൂടും. സ്കൂളുകളിലും കോളേജുകളിലും ക്ലബ്ബുകളിലും ഓണാഘോഷങ്ങൾ ആരംഭിക്കുന്നതോടെ ഉപ്പേരി വില ഉയരാനാണ് സാദ്ധ്യത.