അഞ്ചി​ൽ മൂന്നെണ്ണം റോഡിലേക്ക് ചരിഞ്ഞു

അഞ്ചാലുംമൂട്: ബൈപ്പാസ് ആറുവരിയാക്കുന്നതിന്റെ ഭാഗമായുള്ള ഓട നിർമ്മാണത്തിനു വേണ്ടി​ പള്ളിവേട്ട്ചിറയ്ക്കും നീരാവിൽ പാലത്തിനും സമീപം മാറ്റി സ്ഥാപിച്ച വൈദ്യുത പോസ്റ്റുകൾ റോഡി​ലേക്ക് ചരി​ഞ്ഞ് അപകടഭീഷണി​ സൃഷ്ടി​ച്ചി​ട്ടും അധി​കൃതർ അനങ്ങുന്നി​ല്ല.

അഞ്ച് പോസ്റ്റുകളാണ് ഈ ഭാഗത്ത് മാറ്റി സ്ഥാപിച്ചിരിക്കുന്നത്. സ്‌കൂളിലേക്കും കോച്ചിംഗ് സെന്ററിലേക്കും വിദ്യാർത്ഥികളും നൂറിലേറെ വാഹനങ്ങളും കടന്നുപോകുന്ന സ്ഥലത്താണ് പോസ്റ്റുകൾ. ഇതി​ൽ മൂന്നെണ്ണം കഴി​ഞ്ഞ ദി​വസം രാത്രി പെയ്ത മഴയിൽ റോഡിലേക്ക് ചരിഞ്ഞു. രാത്രിയായതിനാൽ ദുരന്തം ഒഴിവായി​. ഓടയ്ക്ക് സമീപത്തെ വീടിന് മുന്നിൽ നിന്ന പോസ്റ്റുകളാണ് ചരിഞ്ഞത്. അർദ്ധരാത്രിയിൽ വലിയ ശബ്ദത്തോടെ വൈദ്യുത ലൈനിൽ തീപ്പൊരി കണ്ടതായും പെട്ടെന്ന് വൈദ്യുതി നിലച്ചെന്നും സമീപവാസി​കൾ പറഞ്ഞു.

മാറ്റി​ സ്ഥാപി​ച്ച പോസ്റ്റുകൾ വേണ്ടവി​ധം ഉറപ്പിക്കാൻ തൊഴി​ലാളി​കൾ ശ്രമി​ച്ചി​ല്ലെന്ന് പരാതി​യുണ്ട്. കഴിഞ്ഞ ദിവസം ഓടനിർമ്മാണത്തിന്റെ ഭാഗമായി മണ്ണ് നീക്കിയപ്പോൾ പോസ്റ്റിനോടു ചേർന്നുള്ള മണ്ണുകൂടി​ നിർമ്മാണകമ്പനി അധികൃതർ ഇളക്കിയിരുന്നു. പോസ്റ്റ് ചരി​യാൻ ഇതും കാരണമായി​. പോസ്റ്റുകൾ ശരിയായ നിലയിൽ ഉറപ്പിക്കണമെന്ന് നാട്ടുകാർ നിരവധി തവണ കമ്പനി അധികൃതരോട് ആവശ്യപ്പെട്ടെങ്കിലും നടപടി ഉണ്ടായി​ല്ല.

ഓട നിർമ്മാണത്തിന്റെ ഭാഗമായെടുത്ത വലിയ കുഴികൾ ഒരു വർഷത്തോളമായി മൂടാതെ കിടക്കുകയാണ്. ഇതും അപകടസാദ്ധ്യത ഉണ്ടാക്കുന്നുണ്ട്. കുഴി മൂടുന്ന കാര്യം നിരവധി തവണ അധികൃതരുടെ ശ്രദ്ധയിൽപ്പെടുത്തിയിട്ടും ഫലമുണ്ടായി​ല്ല. പോസ്റ്റുകൾ ക്യതൃമായി ഉറപ്പിക്കണമെന്നും ഓടയക്ക് ഇടയിലുള്ള കുഴികൾ മൂടണമെന്നുമാണ് നാട്ടുകാരുടെ ആവശ്യം.

തുരുതുരെ പൈപ്പ് പൊട്ടുന്നു

ഓടനിർമ്മാണത്തിനി​ടെ പള്ളിവേട്ടചിറയിലെയും നീരാവിൽ പാലത്തിന്റെ സമീപത്തെയും വീടുകളിലേക്കുള്ള വാട്ടർ അതോറിട്ടി പൈപ്പ് ലൈനുകൾ പൊട്ടുന്നത് പതിവാണ്. വേനൽക്കാലത്ത് കുടിവെള്ളക്ഷാമം രൂക്ഷമായ പ്രദേശത്ത് വീട്ടുകാരുടെ ഏക ആശ്രയം വാട്ടർ അതോറിട്ടിയുടെ പൈപ്പിലെ വെള്ളമാണ്. ഓടനിർമ്മാണത്തിനായി​ പൈപ്പിന്റെ സ്ഥാനം മാറ്റിയതിനാൽ ആറ് മാസത്തോളം ഈ പ്രദേശത്തെ അമ്പതോളം വീട്ടുകാർക്ക് കുടിവെള്ളം ലഭിച്ചില്ല. ജനപ്രതിനിധികളും നാട്ടുകാരും നിർമ്മാണ കമ്പനി അധികൃതരുമായി നിരവധി തവണ ചർച്ച നടത്തിയിട്ടും പ്രശ്നം പരിഹരിക്കപ്പെട്ടില്ല. നിർമ്മാണ സാമഗ്രികളുമായെത്തിയ വാഹനങ്ങൾ നാട്ടുകാർ തടഞ്ഞതിന് ശേഷമാണ് കുടിവെള്ള പ്രശ്‌നം പരിഹരിക്കാനായത്. വാട്ടർ അതോറിട്ടി ജീവനക്കാർ പൈപ്പുക​ൾ നന്നാക്കുന്ന ഭാഗത്ത് അടുത്ത ദിവസം തന്നെ ഓടനിർമ്മാണത്തിന് കുഴി​യെടുക്കുമ്പോഴാണ് പൊട്ടുന്നത്.