96.47 ലക്ഷം രൂപ ചെലവിൽ

കാർ പാർക്കിംഗ് 600 സ്ക്വയർ മീറ്റർ

ബൈക്കുകൾ 750 സ്ക്വയർ മീറ്റർ സ്ഥലം

40 കാറുകളും 180 ബൈക്കുകളും പാർക്ക് ചെയ്യാം

കുന്നത്തൂർ: ശാസ്താംകോട്ട റെയിൽവേ സ്റ്റേഷൻ വികസനവുമായി ബന്ധപ്പെട്ട് കൂടുതൽ ട്രെയിനുകൾ സ്റ്റേഷനിൽ നിറുത്തുന്നതിന് മുന്നോടിയായി സ്റ്റേഷനിലെ പാർക്കിംഗ് ഏരിയകളുടെ നിർമ്മാണം പൂർത്തിയായതായി കൊടിക്കുന്നിൽ സുരേഷ് എം.പി അറിയിച്ചു. 96.47 ലക്ഷം രൂപ ചെലവിലാണ് കാർ,ഓട്ടോ,ബൈക്ക്, സൈക്കിൾ എന്നിവ പാർക്ക് ചെയ്യുന്നതിനായാണ് മെറ്റൽ വിരിച്ച് ടാർ ചെയ്ത പാർക്കിംഗ് ഏരിയ നിർമ്മിച്ചത്. കാറുകളുടെ പാർക്കിങ്ങിനായി 600 സ്ക്വയർ മീറ്റർ സ്ഥലവും ബൈക്കുകൾക്കായി 750 സ്ക്വയർ മീറ്റർ സ്ഥലവും ആണ് ക്രമീകരിച്ചിരിക്കുന്നത്. ഇവിടെ 40 കാറുകളും 180 ബൈക്കുകളും പാർക്ക് ചെയ്യുവാൻ കഴിയും.

വികസന വഴിയിൽ

• പ്ലാറ്റ്ഫോമുകളിൽ മിനി ഷെൽട്ടറുകൾ സ്ഥാപിച്ചു.
• കരുനാഗപ്പള്ളി ഭാഗത്തേക്കുള്ള ലെവൽ ക്രോസിന് പകരമായി അടിപ്പാത നിർമ്മിക്കണമെന്നുള്ള ആവശ്യം റെയിൽവേയുടെ ശ്രദ്ധയിൽപ്പെടുത്തിയിട്ടുണ്ട്.
• സ്റ്റേഷൻ കെട്ടിടം പുതുക്കിപ്പണിയും
• പ്ലാറ്റ്ഫോമുകൾ നവീകരിക്കും
• ഇരു പ്ലാറ്റ്ഫോമുകളിലുമായി ലിഫ്റ്റ് സ്ഥാപിക്കും
• അടിസ്ഥാന സൗകര്യ വികസനം

യാത്രക്കാരുടെ നിരന്തര ആവശ്യമായ ആലപ്പുഴ വഴിയുള്ള ട്രെയിനുകളുടെ സ്റ്റോപ്പ്,കൊവിഡിന് മുമ്പ് ഉണ്ടായിരുന്ന ട്രെയിനുകളുടെ സ്റ്റോപ്പുകൾ പുന:സ്ഥാപിക്കൽ,പുതുതായി ദീർഘ ദൂരെ ട്രെയിനുകൾക്ക് സ്റ്റോപ്പ് അടക്കമുള്ള ആവശ്യങ്ങൾ അനുവദിക്കുന്നതിനായി റെയിൽവേ ബോർഡിനും സതേൺ റെയിൽവേ ജനറൽ മാനേജർക്കും കത്ത് നൽകിയിട്ടുണ്ട്.

കൊടിക്കുന്നിൽ സുരേഷ് എം.പി