കരുനാഗപ്പള്ളി : ക്ലാപ്പന ഇ.എം.എസ് ലൈബ്രറി ഏർപ്പെടുത്തിയ ഈ വർഷത്തെ ഓണാട്ടുകര പ്രതിഭാ പുരസ്കാര സമർപ്പണവും തോപ്പിൽ ഭാസി ജന്മശതാബ്ദി ആഘോഷവും മുൻമന്ത്രി ഡോ.തോമസ് ഐസക് ഉദ്ഘാടനം ചെയ്തു. ഓണാട്ടുകര പ്രതിഭാ പുരസ്കാരം കാർഷിക മേഖലയിലെ സമഗ്ര സംഭാവനകൾ പരിഗണിച്ച് കരുനാഗപ്പള്ളി ബോയ്സ് ഹയർ സെക്കൻഡറി സ്കൂൾ അദ്ധ്യാപകൻ വി.രഘുത്തമന് ചടങ്ങിൽ വെച്ച് തോമസ് ഐസക്ക് കൈമാറി. 11,111 രൂപയും ശില്പവും പ്രശസ്തി പത്രവും അടങ്ങുന്നതാണ് പുരസ്കാരം. ഓണാട്ടുകരയുടെ വിപ്ലവകാരി തോപ്പിൽഭാസിയുടെ ജന്മശതാബ്ദിയോടനുബന്ധിച്ച് പൊന്നരിവാളമ്പിളിയിൽ കണ്ണെറിഞ്ഞ നൂറു വർഷങ്ങൾ എന്ന പേരിൽ സംഘടിപ്പിച്ച പരിപാടിയിൽ ആകാശവാണി അസിസ്റ്റന്റ് ഡയറക്ടർ മുഖത്തല ശ്രീകുമാർ അനുസ്മരണ പ്രഭാഷണം നടത്തി. ഗ്രന്ഥശാല പ്രസിഡന്റ് ജി.അനിത അദ്ധ്യക്ഷയായി. സെക്രട്ടറി ആർ.മോഹനൻ സ്വാഗതം പറഞ്ഞു. താലൂക്ക് ലൈബ്രറി കൗൺസിൽ സെക്രട്ടറി വി.വിജയകുമാർ ആമുഖ പ്രഭാഷണം നടത്തി. ഡോ.സുജിത്ത് വിജയൻപിള്ള എം.എൽ.എ മുഖ്യാതിഥിയായി. തോപ്പിൽഭാസിയുടെ മക്കളായ സോമൻ, മാല, ഗ്രാമപഞ്ചായത്ത് പ്രസിഡന്റ് ഒ.മിനിമോൾ ജില്ലാ ലൈബ്രറി കൗൺസിൽ എക്സിക്യുട്ടീവ് കമ്മിറ്റി അംഗം വി.പി.ജയപ്രകാശ് മേനോൻ, എസ്.ഗീതാദേവി, ബി.ബിനു തുടങ്ങിയവർ സംസാരിച്ചു. തുടർന്ന് കെ.പി.എ.സിയുടെ ഒളിവിലെ ഓർമ്മകൾ എന്ന നാടകത്തിന്റെ അവതരണവും നടന്നു.