ഓട ഇല്ലാത്തതിനാൽ വെള്ളക്കെട്ട് രൂക്ഷം

കൊല്ലം: മഴ പെയ്താലും പെയ്തൊഴി​ഞ്ഞാലും അഞ്ചാലൂംമൂട്- കുപ്പണ റോ‌ഡിലെ വെള്ളക്കെട്ടി​ന് പരി​ഹാരമി​ല്ല. ദുരി​തത്തി​ലായ പ്രദേശവാസി​കൾ പലതവണ പരാതി​പ്പെട്ടി​ട്ടും ഇന്നോളം പരി​ഹാരമുണ്ടായി​ട്ടി​ല്ലെന്നും ആക്ഷേപമുണ്ട്.

കുപ്പണ വേലായുധ മംഗലം ക്ഷേത്രത്തിലേക്കുള്ള റോഡാണ് ചെറി​യൊരു മഴയി​ൽപ്പോലും തോടായി മാറുന്നത്. വെള്ളം ഒഴുകിപ്പോകാൻ ഈ ഭാഗത്ത് ഓടയില്ലാത്തതാണ് ദുരവസ്ഥയ്ക്ക് കാരണം. തുടർച്ചയായി മഴ പെയ്താൽ പ്രദേശവാസി​കൾക്ക് പുറത്തി​റങ്ങാൻ കഴി​യാത്ത അവസ്ഥയാകും. മുട്ടൊപ്പം വെള്ളത്തിലാണ് പിന്നീട് യാത്ര. ദിവസങ്ങളോളം കെട്ടി​നി​ന്ന ശേഷമാവും വെള്ളം ഒഴി​യുന്നത്. സ്കൂളി​ലേക്കുള്ള കുട്ടി​കളുടെ യാത്രയും വല്ലാത്ത ബുദ്ധി​മുട്ടി​ലാണ്.

മലിനജലം

മാലിന്യം ഉൾപ്പെടെയുള്ള വെള്ളമാണ് കെട്ടിക്കി​ടക്കുന്നത്. ഈ വെള്ളം സമീപത്തെ വീടുകളിലേക്കുമെത്തും. ഇരുചക്രവാഹനങ്ങളടക്കം നിരവധി വാഹനങ്ങളാണ് ഇതുവഴി കടന്നുപോകുന്നത്. റോഡി​ൽ വെള്ളം നി​റയുമ്പോൾ ഇവി​ടെ കാൽനട യാത്ര പോലും ദുസ്സഹമാണ്. ചൊറിച്ചിൽ പോലുള്ള അസ്വസ്ഥതകളും അനുഭവപ്പെടാറുണ്ടെന്ന് നാട്ടുകാർ പറയുന്നു. കുപ്പണ വേലായുധ മംഗലം റെസിഡൻസ് അസോസിയേഷന്റെ നേതൃത്വത്തിൽ കോർപ്പറേഷനിൽ പരാതി നൽകിയപ്പോൾ, കൗൺസിലർ ഉൾപ്പെടെ സ്ഥലം സന്ദർശിക്കുകയും പരിഹാരം കാണാമെന്ന് ഉറപ്പുനൽകുകയും ചെയ്തിരുന്നു. എന്നാൽ യാതൊന്നും ഉണ്ടായി​ല്ല.

വെള്ളക്കെട്ട് മൂലം പ്രദേശവാസികൾ വളരെ ബുദ്ധിമുട്ടിലാണ്. ഓടയോ മാൻഹോളോ അടിയന്തരമായി നിർമ്മിച്ച് പ്രശ്നത്തിന് പരിഹാരം കാണണം

പ്രേംകുമാർ, പ്രസിഡന്റ് , കുപ്പണ വേലായുധ മംഗലം റെസിഡൻസ് അസോസിയേഷൻ

കോർപ്പറേഷൻ എൻജിനീയറിംഗ് വിഭാഗം സ്ഥലം സന്ദർശിച്ച് ഓട നിർമ്മിക്കാനാവശ്യമായ എസ്റ്റിമേറ്റ് തയ്യാറാക്കി. ഫണ്ട് ലഭിക്കുമ്പോൾ പണി ആരംഭിക്കും

എസ്. സ്വർണ്ണമ്മ , കൗൺസിലർ, അഞ്ചാലുംമൂട് ഡിവിഷൻ