കുന്നത്തൂർ: ദേശീയപാതയിൽ പോരുവഴി ശാസ്താംനട ജംഗ്ഷന് പടിഞ്ഞാറ് വില്ലേജ് ഓഫീസിന് സമീപം കാറിലേക്ക് സ്കൂട്ടർ ഇടിച്ചുകയറി രണ്ട് യുവാക്കൾക്ക് പരിക്കേറ്റു. ശാസ്താംനട കുറുമ്പകര സ്വദേശികളായ ജഗൻ (20), കാർത്തിക്ക് (21) എന്നിവർക്കാണ് പരിക്കേറ്റത്. അപകടത്തിൽ ഒരാളുടെ കാൽ ഒടിഞ്ഞുതൂങ്ങിയതായി ദൃക്സാക്ഷികൾ പറഞ്ഞു. ഇരുവരെയും ശാസ്താംകോട്ട താലൂക്ക് ആശുപത്രിയിൽ പ്രവേശിപ്പിച്ചു. വെള്ളിയാഴ്ച ഉച്ചയ്ക്ക് ഒന്നോടെയായിരുന്നു അപകടം. ശാസ്താംനടയിലെ പമ്പിൽ നിന്ന് പെട്രോൾ വാങ്ങാൻ പോയ യുവാക്കൾ സഞ്ചരിച്ച സ്കൂട്ടർ അടൂർ ഭാഗത്തേക്ക് പോയ കാറിലേക്ക് ഇടിച്ചുകയറുകയായിരുന്നു.