കൊല്ലം: ജി​ല്ലയി​ൽ ഓണക്കാലത്ത് ഭക്ഷ്യ സുരക്ഷ വകുപ്പ് നടത്തിയത് 268 പരിശോധനകളി​ൽ, ക്രമക്കേടുകൾ കണ്ടെത്തിയ മൂന്ന് കടകൾ അടപ്പിച്ചു. 65 കടകൾക്ക് നോട്ടീസ് നൽകി. 41 നിരീക്ഷണ സാമ്പിളുകൾ ശേഖരിച്ചു. ഒമ്പതു മുതൽ 13 വരെയാണ് പ്രത്യേക സ്‌ക്വാഡ് ഓണക്കാല പരിശോധന നടത്തി​യത്.

ഇക്കാലയളവിൽ ഏറ്റവും അധികം വില്പന നടക്കുന്ന പായസം, പപ്പടം, എണ്ണ, പാൽ, നെയ്യ് എന്നിവ വിൽക്കുന്ന കടകളിലും ബേക്കറികളിലും ഹോട്ടലുകളിലുമാണ് സ്ക്വാഡ് കയറി​യി​റങ്ങി​യത്. സ്ഥാപനങ്ങളുടെ ഭക്ഷ്യ സുരക്ഷാ ലൈസൻസും ജീവനക്കാരുടെ ഹെൽത്ത് കാർഡും പ്രദർശിപ്പിക്കാതിരുന്നതി​നും ഭക്ഷ്യ വസ്തുക്കളിൽ ലേബൽ പതിക്കാത്ത പത്തി​ലേറെ സ്ഥാപനങ്ങൾക്കും നോട്ടീസ് നൽകിയി​ട്ടട്ടുണ്ട്.

പാലിന്റെ ഗുണമേന്മ അളക്കാനും വ്യാജ പാൽ കണ്ടെത്താനുമായി ആര്യങ്കാവ് ചെക്ക് പോസ്റ്റിൽ വിപുലമായ സജ്ജീകരണങ്ങളാണ് ഭക്ഷ്യ സുരക്ഷാ വകുപ്പ് ഒരുക്കിയിരുന്നത്. പാലിന്റെ 105 സാമ്പിളുകൾ ഇവിടെ നിന്നു ശേഖരിച്ചു. പച്ചക്കറികളുമായെത്തിയ 30ൽ അധി​കം വാഹനങ്ങൾ കീടനാശി​നി​ പരിശോധനയ്ക്ക് വിധേയമാക്കി. ഫലം വരുന്നത് മുറയ്ക്ക് തുടർനടപടികൾ സ്വീകരിക്കുമെന്ന് ഭക്ഷ്യ സുരക്ഷാവകുപ്പ് അധികൃതർ അറിയിച്ചു. ഭക്ഷ്യസുരക്ഷാ വകുപ്പ് അസിസ്റ്റന്റ് കമ്മി​ഷണർ ടി.എസ്. വിനോദ്കുമാർ നേതൃത്വം നൽകി​.

ഉപഭോക്താക്കൾക്ക് ഭക്ഷണത്തിന്റെ സുരക്ഷയെക്കുറിച്ച് പരാതിയുണ്ടെങ്കിൽ 1800 425 1125 എന്ന ടോൾ ഫ്രീ നമ്പറിൽ ബന്ധപ്പെടാം. ഇതുകൂടാതെ https://www.eatright.foodsafety.kerala.gov.in/ എന്ന പോർട്ടൽ മുഖേനയും പരാതി നൽകാം.