തിരക്കു കാരണം ട്രെയിനിൽ കുഴഞ്ഞു വീഴുന്നവർ ഏറെ

കൊല്ലം: തി​ക്കി​ത്തി​രക്കി​ൽ യാത്രക്കാർ കുഴഞ്ഞുവീഴുന്ന സംഭവങ്ങൾ പതി​വായി​ട്ടും കൂടുതൽ ജനറൽ കോച്ചുകളും പുതിയ സർവ്വീസുകളും അനുവദിക്കാതെ റെയി​ൽവേയുടെ കടുംപിടി​ത്തം. ട്രെയി​നുകളി​ൽ കയറി​പ്പറ്റാനാവാത്തതി​നാൽ കൃത്യസമയത്ത് ജോലി​സ്ഥലത്ത് എത്താനാവാത്തവരും അനവധി​.

എറണാകുളം ഭാഗത്തേക്ക് രാവിലെ ജോലിക്ക് പോകുന്നവർക്ക് ആശ്രയിക്കാവുന്ന ആറ് ട്രെയിനുകളുണ്ട്. എറണാകുളം, ആലപ്പുഴ, കോട്ടയം അടക്കമുള്ള ജില്ലകളിലെ വിവിധ സർക്കാർ ഓഫീസുകളിലെയും സ്വകാര്യ സ്ഥാപനങ്ങളിലെയും ജീവനക്കാർക്ക് പുറമേ ആയിരക്കണക്കിന് വിദ്യാർത്ഥികളും ഈ ട്രെയിനുകളെയാണ് ആശ്രയിക്കുന്നത്. ഇതിൽ രണ്ടെണ്ണം പുലർച്ചെ അഞ്ചി​ന് മുൻപാണ്. പല ട്രെയിനുകളിൽ നിന്നു യാത്രക്കാർ ഇറങ്ങിക്കഴിയുമ്പോൾ തന്നെ അടുത്തത് പുറപ്പെടുന്ന സമയമാകും. അതി​നാൽ ട്രെയിനിലേക്ക് ചാടിക്കയറുന്നത് കൊല്ലം റെയിൽവേ സ്റ്റേഷനിലെ പതിവ് കാഴ്ചയാണ്. തിരക്കേറിയ ദിവസങ്ങളിൽ ബോഗികൾക്ക് പുറത്ത് യാത്രക്കാർ തൂങ്ങിക്കിടക്കുന്ന അവസ്ഥയമുണ്ട്. സ്ഥിരം യാത്രക്കാരായ സീസൺ ടിക്കറ്റുകാരാണ് ഈ ദുരിതം അനുഭവിക്കുന്നത്.

രാവി​ലെ ആറി​നു ശേഷമുള്ള ട്രെയിനുകൾ ലഭി​ച്ചാൽ എറണാകുളം വരെയുള്ളവർക്ക് ഓഫീസിൽ കൃത്യസമയത്ത് എത്താം. പക്ഷെ ഈ ട്രെയിനുകളിലെ കയറിപ്പറ്റാൻ കഴിയുമോയെന്ന ആശങ്ക കാരണം നൂറുകണക്കിന് യാത്രക്കാർ പുലർച്ചെ വീട്ടിൽ നിന്നി​റങ്ങി 4.50ന് കൊല്ലത്ത് നിന്നു പുറപ്പെടുന്ന പാലരുവിയേയും 4.28ന് പുറപ്പെടുന്ന ഏറനാടിനെയും ആശ്രയിക്കേണ്ട അവസ്ഥയാണ്. ഇവരിൽ പലരും ട്രെയിനുകളിലിരുന്നാണ് പ്രഭാതഭക്ഷണം കഴിക്കുന്നത്.

...............................

 സീസൺ ടിക്കറ്റിന് ആനുപാതികമായി ജനറൽ കോച്ചില്ല

 മറ്റ് കോച്ചുകളിൽ കയറുന്നവർക്ക് പിഴ ചുമത്തുന്നത് പതിവ്
 യാത്രക്കാർക്ക് പ്രയോജനപ്പെടുന്ന സമയങ്ങളിൽ കൂടുതൽ ട്രെയിനില്ല

 കൂടുതൽ സർവീസ് ആരംഭിക്കണമെന്ന ആവശ്യം പരിഗണിക്കുന്നില്ല

...............................

കൊല്ലത്ത് നിന്നു രാവിലെ എറണാകുളത്തേക്കുള്ള ട്രെയിനുകൾ

 പാലരുവി- 4.45
 വേണാട്- 6.34
 പരശുറാം- 7.24
 ശബരി- 7.48

 ശതാബ്ദി- 6.55

 ഏറനാട്- 4.25

സീസൺ ടിക്കറ്റുകാർക്ക് കയറാവുന്ന കൂടുതൽ ജനറൽ കോച്ചുകൾ അനുവദിക്കണം. അല്ലെങ്കിൽ ട്രെയിനുകൾക്കുള്ളിൽ ദുരന്തങ്ങളുണ്ടാകും. പ്രയോജനപ്പെടുന്ന തരത്തിൽ കൂടുതൽ മെമു സർവ്വീസുകളടക്കം ആരംഭിക്കണം

ലിയോൺസ്, ഫ്രണ്ട്സ് ഓൺ റെയിൽസ്