കൊല്ലം: സൂര്യൻ മറഞ്ഞാൽ സ്ത്രീകൾക്കും വിദ്യാർത്ഥികൾക്കും ഭീഷണിയും ഭീതിയുമായി കൊല്ലം നഗരത്തിലെ ഹൈസ്കൂൾ ജംഗ്ഷനിലുള്ള ബസ് കാത്തിരിപ്പ് കേന്ദ്രം. ജംഗ്ഷനിൽ നിന്ന് അഞ്ചാലുംമൂട്, കുണ്ടറ, പെരുമൺ, പ്രാക്കുളം, പനയം ഭാഗങ്ങളിലേക്ക് പോകാനായി ജനം ആശ്രയിക്കുന്ന ബസ് കാത്തിരിപ്പ് കേന്ദ്രമാണ് ഇരുട്ടിലായത്.

അന്തി​ മയങ്ങി​യാൽ കാത്തിരിപ്പ് കേന്ദ്രം കൂരി​രുട്ടി​ലാവും. അകത്ത് ആളി​രിക്കുന്നത് പുറത്തു നിൽക്കുന്നവർക്ക് കാണാൻ കഴി​യാത്ത അവസ്ഥ. നഗരത്തിലെ തിരക്കുള്ള ബസ് സ്റ്റോപ്പുകളിലൊന്നാണിത്. രാത്രിയിലും ഇവിടെ തിരക്കിന് കുറവുണ്ടാകാറില്ല. ഇരുട്ടായതി​നാൽ യാത്രക്കാർ കാത്തിരിപ്പ് കേന്ദ്രത്തി​ന്റെ പുറത്ത് ബസ് കാത്ത് നിൽക്കേണ്ട സ്ഥിതിയാണ്. ജോലികഴിഞ്ഞ് മടങ്ങുന്ന സ്ത്രീകളും ട്യൂഷന് ശേഷം വീട്ടിലേക്ക് പോകുന്ന വിദ്യാർത്ഥികളുമാണ് എറ്റവും കൂടുതൽ ബുദ്ധിമുട്ടുന്നത്. സമീപത്തെ തെരുവ് വിളക്ക് പണിമുടക്കിയാൽ ദുരിതം ഇരട്ടിയാകും. ഇതുവഴി കടന്നുപോകുന്ന വാഹനങ്ങളുടെ വെളിച്ചം മാത്രമാണ് ഏക ആശ്രയം .

ഉത്തരവാദി​ത്വം​ കോർപ്പറേഷന്

കോർപ്പറേഷനാണ് കാത്തിരിപ്പ് കേന്ദ്രങ്ങളുടെ അറ്റകുറ്റപ്പണി നടത്തേണ്ടത്. എം. മുകേഷ് എം.എൽ.എയുടെ 2019-2020 ആസ്തി വികസന ഫണ്ട് ഉപയോഗിച്ചാണ് ഇവിടെ കാത്തിരിപ്പ് കേന്ദ്രം നിർമ്മിച്ചത്. തെരുവുനായ ശല്യവും ഈ ഭാഗത്ത് രൂക്ഷമാണ്. സന്ധ്യ മയങ്ങുന്നതോടെ സാമൂഹ്യവിരുദ്ധരും ഇവിടങ്ങളിൽ തമ്പടിക്കും. എത്രയും വേഗം ഇവിടെ വെളിച്ചമെത്തിക്കണമെന്നാണ് യാത്രക്കാരുടെ ആവശ്യം.

ബന്ധപ്പെട്ട ഉദ്യോഗസ്ഥരെ നിയോഗിച്ച് പ്രശ്നത്തിന് എത്രയും വേഗം പരിഹാരം ഉണ്ടാക്കും

സജീവ് സോമൻ, ചെയർമാൻ, മരാമത്ത്കാര്യ സ്റ്റാൻഡിംഗ് കമ്മിറ്രി