കൊല്ലം: ക്ഷേത്രത്തിൽ അതിക്രമിച്ച് കയറി മോഷണം നടത്തിയയാൾ പൊലീസ് പിടിയിലായി. ചവറ, കുളങ്ങര ഭാഗം, രാജേഷ് ഭവനിൽ സുനിൽകുമാർ (24) ആണ് ചവറ പൊലീസിന്റെ പിടിയിലായത്.

ഇന്നലെ രാവിലെ 9 മണിയോടെ മടപ്പള്ളിയിലുള്ള കാവനാൽ ദേവി ക്ഷേത്രത്തിൽ ഇയാൾ അതിക്രമിച്ച് കയറി ഏകദേശം 7000 രൂപയോളം വില വരുന്ന വിളക്കുകളും മറ്റും മോഷ്ടിക്കുകയായിരുന്നു. മോഷണം ശ്രദ്ധയിൽപെട്ടതിനെ തുടർന്ന് പ്രതിയെ നാട്ടുകാർ തടഞ്ഞ് വച്ച ശേഷം ചവറ പൊലീസിന് കൈമാറി. പൊലീസ് സംഘം നടത്തിയ പരിശോധനയിൽ ഇയാളിൽ നിന്ന് തൊണ്ടി മുതലുകൾ കണ്ടെടുത്തു. കൊല്ലം വെസ്റ്റ്, ശക്തികുളങ്ങര, ഇരവിപുരം, ചവറ എന്നീ പൊലീസ് സ്റ്റേഷനുകളിൽ സമാനമായ നിരവധി കേസുകൾ ഇയാളുടെ പേരിലുണ്ട്. ചവറ ഇൻസ്‌പെക്ടർ കെ.ആർ. ബിജുവിന്റെ നേതൃത്വത്തിൽ എസ്.ഐമാരായ ഷാജി ഗണേശൻ, ഓമനക്കുട്ടൻ, എ.എസ്.ഐ മിനി മോൾ എന്നിവരടങ്ങിയ സംഘമാണ് പ്രതിയെ പിടികൂടിയത്.