അന്തിക്കാട്: വിദ്യാർത്ഥികളിൽ ദാനശീലം വളർത്തിയെടുക്കുന്നതിന്റെ ഭാഗമായി അന്തിക്കാട് കെ.ജി.എം എൽ.പി സ്‌കൂളിൽ 'സഹപാഠിക്കൊരു കൈത്താങ്ങ്' പദ്ധതിക്ക് തുടക്കം. പണം സ്വരൂപിക്കാൻ വിദ്യാർത്ഥികൾക്ക് നൽകുന്ന 'നന്മച്ചെപ്പ് ' ജീവകാരുണ്യ പ്രവർത്തകൻ ശ്രീമുരുകൻ അന്തിക്കാട് കൈമാറി. പി.ടി.എ പ്രസിഡന്റ് അഖില രാഗേഷ് അദ്ധ്യക്ഷയായി.

സ്‌കൂളിലെ 600ലേറെയുള്ള വിദ്യാർത്ഥികൾക്കാണ് പണം സ്വരുക്കൂട്ടാനായി കാശ് കുടുക്കകൾ നൽകിയത്. വിദ്യാലയത്തിലെ കുട്ടികൾക്കും കുടുംബത്തിനും ആകസ്മികമായി ഉണ്ടാകുന്ന ദുരിതഘട്ടങ്ങളിൽ വിദ്യാർത്ഥികൾ ശേഖരിക്കുന്ന പണം ഉപയോഗിച്ച് കൈത്താങ്ങാകുകയാണ് ലക്ഷ്യം. വീടുകളിൽ കാശുകുടുക്കയിൽ നിക്ഷേപിക്കുന്ന പണം അദ്ധ്യയന വർഷത്തിന്റെ അവസാനം സ്‌കൂളിൽ എത്തിച്ച് ആവശ്യാനുസരണം ഉപയോഗിക്കും.

രക്ഷിതാക്കൾ അടക്കം നിരവധിപേർ പങ്കെടുത്ത ചടങ്ങിൽ പിതാവ് മരിച്ച വിദ്യാർത്ഥിയുടെ കുടുംബത്തിനായും വൃക്കയ്ക്ക് ശസ്ത്രക്രിയ ആവശ്യത്തിനായി മറ്റൊരു കുട്ടിയുടെ മാതാവിനും സഹായധനം കൈമാറി. പ്രധാനാദ്ധ്യാപകൻ ജോഷി ഡി. കൊള്ളന്നൂർ, എം.പി.ടി.എ പ്രസിഡന്റ് അജീഷ, പി.ടി.എ വൈസ് പ്രസിഡന്റ് അന്തിക്കാട് സതീശൻ, ലിയോ, ഉണ്ണിക്കൃഷ്ണൻ, രമ്യ തുടങ്ങിയവർ പങ്കെടുത്തു.