തിരുവനന്തപുരം: കളരിപ്പയറ്റ് മേഖലയിലെ പ്രശ്നങ്ങൾ പരിഹരിക്കാൻ അധികാരികൾ തയ്യാറാകണമെന്നാവശ്യപ്പെട്ട് സ്‌പോർട്‌സ് കൗൺസിലിന് മുന്നിൽ കളരി ഗുരുക്കന്മാരുടെ പ്രതിഷേധ കളരിപ്പയറ്റ് അവതരണം.സ്‌പോർട്‌സ് കൗൺസിലിന് മുന്നിൽ കളരിപ്പയറ്റ് മേഖലയിൽ പ്രവർത്തിക്കുന്ന ഏഴ് സംഘടനകളും സ്വതന്ത്ര കളരികളും ചേർന്നുള്ള കളരിപ്പയറ്റ് സംരക്ഷണ മഹാസമിതിയുടെ നേതൃത്വത്തിലാണ് പ്രതിഷേധിച്ചത്.
പ്രതിഷേധ സമരം കളരിപ്പയറ്റ് ഗുരു മീനാക്ഷി അമ്മ ഓൺലൈനായി ഉദ്ഘാടനം ചെയ്തു.മകൻ സജീവ് സന്ദേശം വായിച്ചു.സംഘടനാ നേതാക്കളായ ക്രിസ്‌റ്റോ,ബാലരാമപുരം വിജയൻ,കളരിക്കൽ അനീഷ്,അൻവർ സാദത്ത് തുടങ്ങിയവർ സംസാരിച്ചു.കളരിപ്പയറ്റിനായി കേന്ദ്ര,സംസ്ഥാന സർക്കാരുകൾ നൽകുന്ന ഫണ്ടുകളും പദ്ധതികളും രംഗത്ത് പ്രവർത്തിക്കുന്ന കുറച്ചുപേരിൽ മാത്രം കേന്ദ്രീകരിക്കുകയാണെന്നും കേരള കളരിപ്പയറ്റ് അസോസിയേഷൻ രൂപീകരിച്ചപ്പോൾ പ്രമുഖരായ ഗുരുക്കൻമാരെ പരിഗണിച്ചില്ലെന്നുമുള്ള മുദ്രാവാക്യങ്ങൾ മുഴക്കിയാണ് പ്രതിഷേധ കളരിപ്പയറ്റ് നടത്തിയത്.