കിളിമാനൂർ: ആറ് വർഷം കഴിഞ്ഞിട്ടും പൂർത്തിയാകാതെ കിളിമാനൂർ ബ്ലോക്ക് പഞ്ചായത്തിന്റെ ഭവനരഹിതർക്കുള്ള ഫ്ലാറ്റ് നിർമ്മാണം. വീടും ഭൂമിയുമില്ലാതെ കഷ്ടപ്പെടുന്നവർക്കായി കിളിമാനൂർ ബ്ലോക്ക് പഞ്ചായത്ത് നടപ്പിലാക്കിയ പദ്ധതിയാണ് ഇഴയുന്നത്.

ബ്ലോക്ക് പഞ്ചായത്തിന്റെ തനത് ഫണ്ട് ഉപയോഗിച്ച് 51 കുടുംബങ്ങൾക്ക് ഒരു കുടക്കീഴിൽ വീടൊരുക്കുന്ന ഭവന പദ്ധതിയാണിത്. എട്ട് പഞ്ചായത്തിലെ ഭവനരഹിതരും ഭൂരഹിതരുമായ പട്ടികജാതിയിൽപ്പെട്ട കുടുംബങ്ങൾക്കായിരുന്നു പദ്ധതിയുടെ പ്രയോജനം ലഭിക്കേണ്ടിയിരുന്നത്.

വിദ്യാഭ്യാസം,കുടിവെള്ളം,വൈദ്യുതി,വിനോദഉപാധികൾ തുടങ്ങിയ സൗകര്യങ്ങളുള്ള മൂന്ന് ഫ്ലാറ്റ് സമുച്ചയങ്ങളിൽ ഒന്ന് ഓണത്തിന് മുൻപായി പൂർത്തിയാക്കി നൽകുമെന്നായിരുന്നു പ്രഖ്യാപിച്ചിരുന്നത്.എന്നാൽ സമീപകാലത്തൊന്നും യാഥാർത്ഥ്യമാകുന്ന ലക്ഷണമില്ല.പഴയകുന്നുമ്മൽ പഞ്ചായത്തിലെ 80 സെന്റ് പുരയിടം ബ്ലോക്ക് പഞ്ചായത്ത് വാങ്ങിയാണ് പദ്ധതി നടപ്പിലാക്കുന്നത്.

 ഭൂമി വാങ്ങിയത് - 64 ലക്ഷം രൂപയ‌്ക്ക്

 പ്രയോജനം - 51 കുടുംബങ്ങൾക്ക്

 ഒരു കുടുംബത്തിനു വേണ്ടി കണക്കാക്കുന്ന തുക - 12 ലക്ഷം

 നിർമ്മാണത്തുക - 6.12 കോടി രൂപ

ബ്ലോക്ക് പഞ്ചായത്തിന്റെ 2017-2018 വാർഷിക പദ്ധതിയിൽ ഉൾപ്പെടുത്തിയാണ് വസ്‌തു വാങ്ങുന്നതിന് 64 ലക്ഷം അനുവദിച്ചത്.

2018-2019 വാർഷിക പദ്ധതിയിൽ ഭവന സമുച്ചയത്തിന്റെ ആരംഭത്തിനും,ചുറ്റുമതിലിനുമായി 74 ലക്ഷവും അനുവദിച്ചു. തുടർപ്രവർത്തനത്തിന് ബ്ലോക്കിന്റെ തനത് ഫണ്ടും ചെലവഴിച്ചു.

ജൈവ ചുറ്റുമതിൽ,സോളാറിൽ വൈദ്യുതി,സ്വിമ്മിംഗ് പൂൾ,അങ്കണവാടി,മിനി ചിൽഡ്രസ് പാർക്ക്,കിൻഡർ ഗാർഡൻ ഇതെല്ലാം ഉൾപ്പെട്ടതാണ് ഫ്ലാറ്റ് സമുച്ചയം.

മൂന്ന് ഫ്ലാറ്റ് സമുച്ചയങ്ങളാണ് നിർമ്മിക്കുന്നത്.18 കുടുംബങ്ങൾക്ക് താമസിക്കാവുന്ന ആദ്യ ഫ്ലാറ്റ് സമുച്ചയത്തിന്റെ നിർമ്മാണം ഓണത്തിന് മുമ്പ് പൂർത്തിയാക്കുമെന്നാണ് പറഞ്ഞിരുന്നത്.