കടയ്ക്കാവൂർ: സുനാമി ഫണ്ടിൽ ഉൾപ്പെടുത്തി സർക്കാർ നിർമ്മിച്ചു നൽകിയ വീടുകളിലൊന്നിന്റെ മേൽക്കൂര തകർന്നുവീണു. അഞ്ചുതെങ്ങ് 6-ാം വാർഡിൽ പുത്തൻനട കേട്ടുപുര കറിച്ചട്ടിമൂലിയിൽ (സുനാമി കോളനി) ആന്റോ - ട്രീസ ദമ്പതികളുടെ വീടിന്റെ കോൺഗ്രീറ്റ് കൊണ്ടുള്ള മേൽക്കൂരയാണ് തകർന്നുവീണത്. കഴിഞ്ഞ ദിവസം രാവിലെ 11ഓടെയായിരുന്നു സംഭവം.ദമ്പതികളും മക്കളും ചെറുമക്കളുമായി 12ഒാളം അംഗങ്ങൾ താമസിക്കുന്ന വീടാണ്.കുട്ടികളടക്കം തലനാരിഴയ്ക്കാണ് രക്ഷപ്പെട്ടത്.

16 വർഷങ്ങൾക്ക് മുൻപ് സുനാമി ഫണ്ട് ഉപയോഗിച്ച് 2 റൂം,വരാന്ത,അടുക്കള ഉൾപ്പെടെ 92ഒാളം വീടുകളാണ് നിർമ്മിച്ചുനൽകിയത്. ഇതിൽ എല്ലാവീടുകളും വാസയോഗ്യമല്ലാത്ത അവസ്ഥയാണെന്ന് താമസക്കാർ പറയുന്നു.വീടുകളുടെ പ്രശ്നം അധികൃതരുടെ ശ്രദ്ധയിൽപ്പെടുത്തിയിട്ടും മെയിന്റനസിനുള്ള സഹായം പോലും കിട്ടുന്നില്ലെന്നു ഇവർ പരാതിപ്പെടുന്നു.